1،8 ملن-عا جۋىق جالدامالى جۇمىسكەردىڭ اقشالاي كىرىستەرى وسەدى.
مەملەكەت باسشىسىنىڭ بيىلعى 1 قىركۇيەكتەگى قازاقستان حالقىنا جولداۋىندا ايتىلعان تاپسىرماسىنا سايكەس، 2023 جىلعى 1 قاڭتاردان باستاپ ەڭ تومەنگى جالاقى مولشەرى 60 000-نان 70 000 تەڭگەگە دەيىن ۇلعايتىلاتىن بولادى، دەپ حابارلايدى Almaty-akshamy.kz.
«ق ر ەڭبەك كودەكسىنە سايكەس، جۇمىس بەرۋشىلەر جۇمىسكەرلەرگە ەڭبەكاقىنى ەتج-دان تومەن ەمەس دەڭگەيدە قامتاماسىز ەتۋگە مىندەتتى. وسىنىڭ ارقاسىندا ءارتۇرلى مەنشىك نىسانىنداعى كاسىپورىنداردىڭ بارلىق سالالارىندا جۇمىس ىستەيتىن جالاقىسى 70 مىڭ تەڭگەگە دەيىنگى 1،8 ملن-عا جۋىق جالدامالى جۇمىسكەردىڭ اقشالاي كىرىستەرى وسەدى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
ءبىرىنشى كەزەكتە ەتج كوتەرىلۋى «جالاقىسى تومەن» قىزمەتكەرلەرگە قاتىستى بولادى. ەكىنشىدەن، جالاقى دەڭگەيىن بەلگىلەۋ كەزىندە ەتج كورسەتكىشىن پايدالاناتىن جۇمىس بەرۋشىلەر رازريادارالىق بىلىكتىلىك جۇيەسىن ەسكەرە وتىرىپ، قىزمەتكەرلەردىڭ باسقا ساناتتارىنىڭ جالاقىسىن قايتا قارايتىن بولادى.
سونىمەن قاتار مەملەكەت باسشىسى ق ر ۇكىمەتىنە ەڭ تومەنگى جالاقىنى انىقتاۋدىڭ جاڭا ادىستەمەسىن ەنگىزۋدى تاپسىردى، بۇل ونىڭ مولشەرىن كەزەڭ-كەزەڭىمەن ارتتىرۋعا مۇمكىندىك بەرەدى.
وسى تاپسىرمانى ورىنداۋ ءۇشىن ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى ديناميكالىق تاسىلدەمەگە نەگىزدەلگەن جانە نەگىزگى ەكونوميكالىق كورسەتكىشتەردى ەسكەرەتىن ەتج ايقىنداۋ ادىستەمەسىن ازىرلەۋگە كىرىستى.
ەتج ەڭبەك سالاسىنداعى ەڭ تومەنگى الەۋمەتتىك ستاندارت بولىپ تابىلادى جانە ءتيىستى قارجى جىلىنا ءار جىل سايىن «رەسپۋبليكالىق بيۋدجەت تۋرالى» ق ر زاڭىمەن بەلگىلەنەتىنىن ەستەرىڭىزگە سالا كەتەيىك.