بۇل تۋرالى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باسقارما باستىعى باقىتجان ءامىرحانوۆ ايتىپ بەردى.
قازاقستاندا ەسىرتكىنى بەيمەديسينالىق ماقساتتا قولدانعانى ءۇشىن جازانى جەڭىلدەتۋ جوسپارلانۋدا، دەپ حابارلايدى Almaty-akshamy.kz
«ەسىرتكىنى بەيمەديسينالىق ماقساتتا قولدانعانى ءۇشىن جازانى جەڭىلدەتۋدى كوزدەيتىن ەكى زاڭ جوباسى ازىرلەندى. ياعني، ەسىرتكىنى از مولشەردە قولدانعان جانە ساقتاعان ادامدار قىلمىستىق ەمەس، اكىمشىلىك جاۋاپكەرشىلىككە تارتىلادى»، - دەدى باقىتجان ءامىرحانوۆ مينيسترلىك ۇيىمداستىرعان ونلاين-بريفينگ بارىسىندا.
سپيكەردىڭ ايتۋىنشا، زاڭ جوباسى پرەكۋرسورلار مەن قاتتى اسەر ەتەتىن زاتتاردىڭ زاڭسىز اينالىمى ءۇشىن جاۋاپكەرشىلىكتى كۇشەيتۋدى كوزدەيدى. سونىمەن بىرگە، سينتەتيكالىق ەسىرتكىنىڭ تارالۋىنا قارسى ءىس-قيمىل ماسەلەلەرىن ەلدىڭ جوعارى باسشىلىعى مەملەكەتتىك باسقارۋ ورگاندارىنىڭ باسىم مىندەتتەرىنىڭ ءبىرى رەتىندە ايقىنداعان.
بۇگىنگى تاڭدا 2022-2023 جىلدارعا ارنالعان جول كارتاسى ازىرلەندى، وندا شەتەلدە وندىرىلگەن ەسىرتكىلەردىڭ تۇسۋىنە، ولاردىڭ ەل ىشىندە تارالۋىنا جانە وندىرىلۋىنە جول بەرمەۋ، ەسىرتكىگە تاۋەلدىلەردى ەمدەۋ جانە وڭالتۋ، سونداي-اق ىشكى ىستەر، دەنساۋلىق ساقتاۋ، سوت ساراپتاماسى ورگاندارىن جانە شەكارالىق وتكىزۋ پۋنكتتەرىن ماتەريالدىق-تەحنيكالىق جاراقتاندىرۋ شارالارى كوزدەلگەن.
اسا ءقاۋىپتى بولىپ سانالاتىن مەفەدروننىڭ، پيروۆالەروننىڭ جانە ولاردىڭ انالوگتارىنىڭ، سينتەتيكالىق كاننابينويدتاردىڭ «كريمينالدىق» مولشەرى 50 گرامنان 1 گرامعا دەيىن زاڭ جۇزىندە تومەندەتىلدى. ولاردى وتكىزۋ ماقساتىنسىز ساقتاعانى ءۇشىن قىلمىستىق جاۋاپكەرشىلىك كۇشەيتىلگەن.