قازاقستاندا ەسىرتكى زەرتحانالارى سانىنىڭ ءوسۋى بايقالادى.
وسى جىلدىڭ جەتى ايىندا پوليسيا تەك سينتەتيكالىق ەسىرتكى ءوندىرۋدى جولعا قويعان 24 جاسىرىن ەسىرتكى زەرتحاناسى جويىلعان، – دەپ حابارلايدى aqshamnews.kz Polisia.kz-كە سىلتەمە جاساپ.
الماتىدا وسىنداي 11 فاكت انىقتالعان. Eكىنشى ورىندى الماتى وبلىسى يەلەنگەن. بۇل وڭىردەن پوليسەيلەر جەتى زاڭسىز سينتەتيكالىق ەسىرتكى ءوندىرىسىن جويىپتى. ەسىرتكى وندىرۋشىلەردەن 200 كگ-نان استام “سينتەتيكا” جانە ەكى توننادان استام پرەكۋرسور تاركىلەنگەن.
سوڭعى ەكى اپتادا الماتىدا ەكى ەسىرتكى زەرتحاناسى جويىلعان. شىلدە ايىنىڭ سوڭىندا ءۇش استانالىق تۇرعىن ۇستالىپتى. ولار 800 مىڭ تەڭگەگە ءۇي جالداپ، وندا مەفەدرون ءوندىرىسىن ۇيىمداستىرعان. ولار بارلىق جابدىقتار مەن حيميالىق زاتتارعا قاشىقتان تاپسىرىس بەرىپ وتىرعان. كۇدىكتىلەردەن 20 كگ دايىن ەسىرتكى، 250 ليتر پرەكۋرسور مەن حيميالىق جابدىقتار تاركىلەنگەن. اراعا ون كۇن سالىپ، پوليسەيلەر ەسىرتكى ساقتادى دەگەن كۇدىكپەن 23 جاستاعى الماتىلىق تۇرعىندى ۇستادى. ول تۇرىپ جاتقان ءۇيدىڭ توبەسىن ءتىنتۋ كەزىندە مەفەدرون، پرەكۋرسور، تىنىس الۋ ماسكاسى، ەسىرتكى سينتەزىنە ارنالعان جابدىق تاركىلەنگەن. قاسكويدىڭ “ۆيرتۋالدى” كۋراتورلارى دايىن ەسىرتكىنىڭ كيلوگرامى ءۇشىن 1،5 ملن تەڭگە تولەۋگە ۋادە بەرگەن كورىنەدى. ەسىرتكى ءوندىرىسى ءۇشىن بۇل جىگىتتىڭ 15 جىلعا جۋىق مەرزىمگە باس بوستاندىعىنان ايىرىلاتىنى انىق.
بۇگىندە ەسىرتكى وندىرىسىندە قولدانىلاتىن حيميالىق جابدىقتاردىڭ اينالىمى ءۇشىن قىلمىستىق جاۋاپكەرشىلىك ەنگىزىلگەن. قازىرگى ۋاقىتتا پارلامەنت ماجىلىسىندە ەسىرتكى وندىرگەنى ءۇشىن جازانى ءومىر بويىنا باس بوستاندىعىنان ايىرۋعا دەيىن قاتاڭداتاتىن زاڭ جوباسى قارالۋدا. بۇل باستامالاردى قوعام قولدايدى. سونىمەن قاتار ەسىرتكىنى تاراتقانى ءۇشىن جازا مەرزىمدەرىن قىسقارتىپ، ولاردى وندىرگەنى ءۇشىن جاۋاپكەرشىلىكتى كۇشەيتۋ بويىنشا ازاماتتار قۇرعان ەكى پەتيسيا قاراۋعا الىندى.