تاريف قالىپتاستىرۋ قاعيداسىنا وزگەرىس ەنگىزىلەدى
ەنەرگەتيكتەردىڭ ەڭبەكاقىسىن كوتەرۋ باعىتىندا ءبىرقاتار شارا قابىلدانىپ جاتىر. بۇل تۋرالى ق ر پرەمەر-مينيسترى ءاليحان سمايىلوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلى ەنەرگيا ءوندىرۋشى ۇيىمدار ەلەكتر قۋاتىن وندىرۋگە شەكتى ءتاريفتى تۇزەتۋ كەزىندە وندىرىستىك جۇمىسشىلاردىڭ جالاقىسىن ارتتىرۋ بويىنشا شارا قابىلدادى. ول بويىنشا ەڭبەكاقىنى 15% كوبەيتۋ كوزدەلگەن. سونىمەن قاتار تابيعي مونوپوليا سۋبەكتىلەرىنىڭ جىلۋ ەنەرگياسىن ءوندىرۋ تاريفىندە ەڭبەكاقى تولەۋ قورىن جىل سايىن 4% ءوسىرۋ قارالعان. وسىعان بايلانىستى 2021 جىلدىڭ قورىتىندىسى بويىنشا قازاقستاننىڭ جەو وندىرىستىك قىزمەتكەرلەر جالاقىسىنىڭ ورتاشا ءوسىمى - شامامەن 10%» ، - دەدى ءاليحان سمايىلوۆ دەپۋتاتتىق ساۋالعا بەرگەن جاۋابىندا.
ۇكىمەت باسشىسىنىڭ ايتۋىنشا، ەنەرگەتيكا مينيسترلىگى، ەلەكتر ەنەرگەتيكاسى قاۋىمداستىعى جانە سالالىق كاسىپوداقتار اتىنان جۇمىس بەرۋشىلەر اراسىندا قول قويىلعان 2022-2024 جىلدارعا ارنالعان سالالىق كەلىسىم شەڭبەرىندە ەنەرگەتيكا سالاسى قىزمەتكەرلەرىنىڭ جالاقىسىن ارتتىرۋ كوزدەلىپ وتىر.
«سونداي-اق، تابيعي مونوپوليالار سالاسىنداعى ۋاكىلەتتى ورگان جىلدىق ستاتيستيكاعا سۇيەنە وتىرىپ، ەكونوميكالىق قىزمەت تۇرلەرى بويىنشا وڭىرلەر بولىنىسىندە وندىرىستىك جانە اكىمشىلىك-باسقارۋ قىزمەتكەرلەرىنىڭ ورتاشا ايلىق جالاقىسىن ايقىنداۋ جونىندەگى تالاپتى بەلگىلەۋ بولىگىندە تاريف قالىپتاستىرۋ قاعيدالارىنا وزگەرىستەر ەنگىزۋ ماسەلەسىن قاراستىرىپ جاتىر» - دەيدى ول.