جالپى ەكسپورتتىق الەۋەت 170 ميلليون دوللارعا باعالانادى
يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ قازاقستان-گرۋزيا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ون ءبىرىنشى وتىرىسىن قورىتىندىلادى. وعان جاساعان جۇمىس ساپارى بارىسىندا قاتىستى، دەپ حابارلايدى Almaty-akshamy.kz مينيسترلىكتىڭ Telegram–داعى كانالىنا سىلتەمە جاساپ.
ۆەدومستۆو باسشىسى حابارلاعانداي، وتىرىس بارىسىندا تاراپتار ترانسكاسپيي حالىقارالىق كولىك باعدارىن دامىتۋ پەرسپەكتيۆالارىن قاراستىردى. قايىربەك وسكەنبايەۆ بۇل باعىتتا قازاقستاندىق ەكسپورتتىڭ ۇلعاياتىنىن، ونىڭ ىشىندە قىتايدان ءترانزيتتىڭ كولەمى ۇلعايا بەرەتىنىن، وسى ورايدا گرۋزيا اۋماعى ارقىلى ءترانزيتتىڭ ىڭعايلىلىعىن ساقتاي وتىرىپ، ىنتىماقتاستىقتى ودان ءارى دامىتۋ كەرەكتىگىن اتاپ ءوتتى.
«ترانسكاسپيي باعىتى گرۋزيا ەكسپورتىنىڭ ساۋداسىن ودان ءارى كەڭەيتۋگە كاتاليزاتور بولادى. كاسپيي تەڭىزىندە قولايلى باسەكەگە قابىلەتتى ءتاريفتى بەلگىلەۋگە ىقپال ەتەتىن ءتورت پاروم سالۋدى جوسپارلاپ وتىرمىز»، - دەدى مينيستر.
بۇعان دەيىن حابارلانعانداي، 31 ناۋرىزدا گرۋزيا، ازەربايجان، تۇركيا جانە قازاقستان ترانسكاسپيي حالىقارالىق كولىك ءدالىزىن دامىتۋ تۋرالى ءتورتجاقتى مالىمدەمەگە قول قويدى. ول سونداي-اق ەكى ەل اراسىنداعى ءوزارا ساۋدا-ساتتىقتى ارتتىرۋ ءۇشىن ايتارلىقتاي الەۋەت بار ەكەنىن اتاپ ءوتتى.
قازاقستاندىق كومپانيالار مەتاللۋرگيا، مۇناي-حيميا، تاماق جانە ماشينا جاساۋ، سونداي-اق فارماسيەۆتيكا سىندى ءبىرقاتار سالادا وڭدەلگەن تاۋارلار ەكسپورتىن ارتتىرۋعا دايىن. جالپى ەكسپورتتىق الەۋەت 170 ميلليون دوللارعا باعالانادى. ءوز كەزەگىندە، ۇكىمەتارالىق كوميسسيا وتىرىسىندا گرۋزيانىڭ ۆيسە-پرەمەرى، ەكونوميكا جانە تۇراقتى دامۋ ءمينيسترى ليەۆان داۆيتاشۆيلي ەلدىڭ سيىر ەتىن، ءسۇت ونىمدەرىن، ماكارون ونىمدەرىن، وسىمدىك مايى مەن بيداي ۇنىن جەتكىزۋگە مۇددەلى ەكەنىن اتاپ ءوتتى.
قازاقستان ەكسپورتتاۋشى كاسىپورىنداردىڭ تىزبەسىن ۇسىنۋعا، سونداي-اق ەكونوميكانىڭ ءتۇرلى سالالارىندا 40 اتاۋ بويىنشا گرۋزياعا ءونىم ەكسپورتىن ۇلعايتۋعا دايىن ەكەنىن جەتكىزدى. سونىمەن قاتار، قازاقستان استىق ەكسپورتتاۋشىلارى نارىق نەگىزىندە گرۋزيا نارىعىنا بيداي جەتكىزۋگە دايىن.
سونداي-اق، وتىرىس بارىسىندا تاراپتار اۆتوموبيل كولىگىمەن جۇك تاسىمالداۋ ءۇشىن 2022 جىلعا رۇقسات بلانكىلەرىن جانە 2023 جىلعا الدىن الا كۆوتا الماستىرۋدى بەلگىلەدى. سونىمەن قاتار، قازاقستاندىق تاراپ گرۋزيالىق اۆياكومپانيالارعا قازاقستانعا تۇراقتى رەيس ۇشىرۋدى ۇسىندى. بۇگىنگى تاڭدا وتاندىق «ەير استانا»، «Fly Arystan» جانە «SCAT» اۆياكومپانيالارى گرۋزياعا تۇراقتى تۇردە 19 رەيس ورىندايدى. قازاقستان مەن گرۋزيا ۇكىمەتارالىق كوميسسياسىنىڭ ون ءبىرىنشى وتىرىسى ەكى ەل اراسىنداعى ديپلوماتيالىق قاتىناستىڭ ورناعانىنا 30 جىل تولۋىنا وراي وتكىزىلدى.