جۇمىس ىزدەۋگە كومەكتەسەدى.
ەلەكتروندىق ەڭبەك بيرجاسىندا كورسەتىلەتىن جۇمىسپەن قامتۋ سالاسىنداعى قىزمەتتەردى ەندى سمارتفونعا ارنالعان قوسىمشا ارقىلى الۋعا بولادى، دەپ حابارلايدى Almaty-akshamy.kz.
Enbek.kz ءموبيلدى نۇسقاسى سايتپەن تولىعىمەن سينحروندالعان جانە ءقازىردىڭ وزىندە جۇمىس ىزدەۋگە كومەكتەسىپ قانا قويماي، جۇمىسسىز قالعانى ءۇشىن الەۋمەتتىك تولەم الۋ ءۇشىن جۇمىسسىز رەتىندە تىركەلۋگە مۇمكىندىك بەرەدى.
«Enbek» ءموبيلدى قوسىمشاسىندا پايدالانۋشىلار وزدەرىن قىزىقتىرعان بوس جۇمىس ورىندارىن قاراپ جانە جۇمىس بەرۋشىلەردەن شاقىرۋلار الا الادى. Push حابارلاندىرۋلارىنىڭ ىڭعايلى مۇمكىندىگى تۇيىندەمە مەن جاۋاپتاردى، سۇحباتقا شاقىرۋلاردى جانە جۇمىس بەرۋشىنىڭ اڭگىمەلەسۋ ناتيجەلەرى بويىنشا شەشىمدەرىن قاراۋ تۋرالى اقپاراتتى وتكىزىپ الماۋىنا كومەكتەسەدى.
«قوسىمشا پايدالانۋشىعا تۇيىندەمەنىڭ قانشالىقتى تولىق تولتىرىلعانىن، جۇمىس بەرۋشىنىڭ وعان نازار اۋدارۋى ءۇشىن تاعى نە قوسۋعا بولاتىنىن ايتادى. ال ىزدەنۋشىنى قىزىقتىراتىن سالا بويىنشا جاڭا بوس جۇمىس ورىندارىن جىبەرىپ الماۋ ءۇشىن ىزدەۋ پارامەترلەرىن ساقتاپ، قولايلى بوس جۇمىس ورىندارى تۋرالى حابارلاما الۋعا بولادى»، – دەدى «ەردو» اق جۇمىسپەن قامتۋ سالاسىنداعى سيفرلىق قىزمەتتەر دەپارتامەنتىنىڭ ديرەكتورى نيكولاي بريۋحانوۆ.
سونىمەن قاتار قوسىمشادا جۇمىسسىز رەتىندە تىركەلۋ جانە جۇمىسىنان ايىرىلۋىنا بايلانىستى الەۋمەتتىك تولەم الۋ مۇمكىندىگى بار. ول ءۇشىن ەلەكتروندىق سيفرلىق قولتاڭبانىڭ بولۋى قاجەت ەمەس، تەك ءموبيلدى ازاماتتار بازاسىندا تىركەلۋ جەتكىلىكتى.
ەەب-دا ءاردايىم مەملەكەت سۋبسيديالايتىن ۋاقىتشا جۇمىس ورىندارىنىڭ كەڭ تاڭداۋى بار. ولار - قوعامدىق جۇمىستار، الەۋمەتتىك جۇمىس ورىندارى، جاستار پراكتيكاسى، «العاشقى جۇمىس ورنى»، «ۇرپاقتار كەلىسىمشارتى» جانە «كۇمىس جاس» جوبالارى بويىنشا بوس ورىندار.
«كەلەشەكتە قوسىمشانىڭ فۋنكسيونالدىعى كەڭەيىپ، جاڭا سەرۆيستەر مەن قىزمەتتەر قوسىلادى. قوسىمشا بارلىق پايدالانۋشىلار ءۇشىن تەگىن جانە PlayMarket جانە AppStore دۇكەندەرىندە قولجەتىمدى»، – دەدى نيكولاي بريۋحانوۆ.