بۇگىن مەملەكەت باسشىسى ايەلدەردىڭ قۇقىعى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرىنە ارنالعان زاڭعا قول قويدى.
وسى ورايدا مىناداي ءۇش ماسەلەگە نازار اۋدارعان ءجون.
ءبىرىنشى. مەملەكەت باسشىسى قاسىم-جومارت توقايەۆ اۋەل باستان ايەلدەر مەن بالالاردىڭ قۇقىقتارىن قورعاۋ ىسىنە باسا ءمان بەرەدى. وسى جىلداردا تۇرمىستىق زورلىق-زومبىلىققا قارسى كۇرەسكە قاتىستى كەشەندى شارالار جۇيەسى كەزەڭ-كەزەڭىمەن قالىپتاستى. بۇگىن قابىلدانعان زاڭ وتباسىنداعى زورلىق-زومبىلىققا قارسى ءىس-قيمىلدى قۇقىقتىق تۇرعىدان رەتتەۋ ءىسىن قورىتىندىلايدى.
ەكىنشى. تۇرمىستىق زورلىق-زومبىلىققا قارسى كۇرەستىڭ ءتيىمدى مەحانيزمىن جاساۋ – بيلىك پەن قوعامنىڭ سىندارلى ىنتىماقتاستىعىنىڭ ناتيجەسى. مىسالى، بۇل سالاداعى العاشقى باستامالار ۇلتتىق قوعامدىق سەنىم كەڭەسى مۇشەلەرى بەرگەن ۇسىنىستار مەن ۇسىنىمدار نەگىزىندە ازىرلەندى. بۇگىن قابىلدانعان زاڭدى دايارلاۋعا دا بالالاردىڭ قۇقىقتارى جونىندەگى ۋاكىل، ۇلتتىق قۇرىلتاي مەن ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى بەلسەنە اتسالىستى.
ءۇشىنشى. جاڭا زاڭ – پرەزيدەنتتىڭ قوعامداعى بەس كەسەلمەن كۇرەسۋ جونىندەگى جالپىۇلتتىق باستاماسى اياسىندا قابىلدانعان ناقتى شارانىڭ ءبىرى. پرەزيدەنت اتىراۋداعى سوزىندە قوعامداعى كەسەلدىڭ ءبىرى رەتىندە تۇرمىستىق زورلىق-زومبىلىقتى، بۋللينگ پەن اگرەسسيانى دا اتاپ ءوتتى.
وسى قۇجاتتى قابىلداۋدىڭ ارقاسىندا قازاقستاندا زورلىق-زومبىلىققا قارسى ءىس-قيمىلعا نەگىزدەلگەن ەڭ وزىق زاڭناما قالىپتاستى. سونىمەن بىرگە، وتباسىنداعى زورلىق-زومبىلىقپەن ءتيىمدى كۇرەسۋ ءۇشىن قوعامدا اگرەسسيانىڭ كەز كەلگەن تۇرىنە توزبەۋشىلىك ۇستانىمىن ورنىقتىرۋ ماڭىزدى. سونداي-اق قوعامدا ءوزارا كومەك پەن سىيلاستىق، باسقا ادامدارعا قۇرمەتپەن قاراۋ قۇندىلىقتارىن دارىپتەۋ كەرەك.