بارلىق ءوڭىر مەن ۇيىم ءۇشىن تەڭگەرىمدى باعا الۋى ءتيىس.
ەلەكتر ەنەرگياسىن ءبىرىڭعاي ساتىپ الۋشى ينستيتۋتى ەنگىزىلەدى. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«نارىقتى مونوپوليزاسيالاۋدىڭ جارقىن ۇلگىسى ەلەكتر ەنەرگياسىن ءوندىرۋ جانە جابدىقتاۋ سانالادى. وندا كولبەۋ مونوپوليالىق توپتار تاۋەلسىز جەتكىزۋشىلەردىڭ نارىققا كىرۋىن شەكتەيدى. ءبىز ەلەكتر ەنەرگياسىن ءبىرىڭعاي ساتىپ الۋشى ينستيتۋتىن ەنگىزۋگە كىرىستىك. وسىلايشا، ءونىمسىز دەلدالداردى جانە وندىرۋشىلەردىڭ وزدەرىنەن قاراجاتتى بۇرۋدى الىپ تاستايمىز. قورىتىندىسىندا ەلىمىز بارلىق ءوڭىر مەن ۇيىم ءۇشىن تەڭگەرىمدى باعا الۋى ءتيىس»، - دەدى مەملەكەت باسشىسى.
پرەزيدەنت باس پروكۋراتۋرانىڭ جانىنان ارنايى كوميسسيا قۇرىلعانىن ەسكە سالدى.
«كوميسسيا زاڭسىز جولمەن الىنعان جانە سىرتقا شىعارىلعان اكتيۆتەردى مەملەكەتكە قايتارۋمەن شۇعىلدانادى. مەن جاقىندا ارنايى جارلىققا قول قويدىم. وسىلايشا، بۇل باعىتتاعى جۇمىستىڭ اياسى ناقتىلاندى. وسى شارۋامەن اينالىساتىن قىزمەتتەر ۇيىمداستىرۋ جانە كادرلىق جاعىنان كۇشەيتىلەدى. جۇمىستىڭ تيىمدىلىگى ارتادى دەپ سەنەمىن»، - دەدى قاسىم-جومارت توقايەۆ.