بۇل جۇيەنى جەتىلدىرە ءتۇسۋ قاجەت.
ەلىمىز دەنساۋلىق ساقتاۋ سالاسىنداعى تەحنولوگيالاردىڭ تيىمدىلىگىن باعالايتىن مامانداردى دايارلاۋدى قولعا الدى. بۇل تۋرالى ق ر دەنساۋلىق ساقتاۋ مينيسترلىگىنە قاراستى س. قايىربەكوۆ اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعىنىڭ باسقارما ءتوراعاسى الەكساندر كوستيۋك ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەلىمىزدە دەنساۋلىق ساقتاۋ تەحنولوگيالارىن باعالاۋ سالاسىنىڭ ماماندارىن دايارلاۋ جۇمىستارى ءجۇرىپ جاتىر. دەگەنمەن بۇل جۇيەنى جەتىلدىرە ءتۇسۋ قاجەت. بۇگىندە ۇلتتىق مەديسينا ۋنيۆەرسيتەتى تەحنولوگيانى باعالاۋ ماماندىعى بويىنشا ماگيسترلاردى دايارلاپ جاتىر. كەلەسى جىلى استانا مەديسينالىق ۋنيۆەرسيتەتىندە دە مامان دايارلاۋدى قولعا الماقپىز»، - دەدى الەكساندر كوستيۋك دەنساۋلىق ساقتاۋ تەحنولوگيالارىن باعالاۋدى دامىتۋ ماسەلەسىنە ارنالعان حالىقارالىق عىلىمي-پراكتيكالىق كونفەرەنسيا بارىسىندا.
ونىڭ ايتۋىنشا، دەنساۋلىق ساقتاۋ تەحنولوگيالارىن باعالاۋ جۇيەسى 2010 جىلى باستالدى.
«بۇل ارنايى ماماندىق ەمەس. جالپى مەديسينا ماماندىعىنىڭ ىشىنە كىرەدى. سەبەبى باعالاۋدىڭ مەديسيناعا تىكەلەي قاتىسى جوق، ول دەنساۋلىق ساقتاۋ سالاسىنىڭ ساياساتىنا قاتىستى جايت»، - دەيدى ول.
ايتا كەتەيىك، بۇگىن ەلوردادا شىعىس ەۋروپا جانە ورتالىق ازيا ەلدەرىندە دەنساۋلىق ساقتاۋ تەحنولوگيالارىن باعالاۋدى دامىتۋ ماسەلەسىنە ارنالعان حالىقارالىق عىلىمي-پراكتيكالىق كونفەرەنسيا ءوتىپ جاتىر.
اتالعان شارادا دەنساۋلىق ساقتاۋ سالاسىن قارجىلاندىرۋ تيىمدىلىگىن ارتتىرۋ ءۇشىن دەنساۋلىق ساقتاۋ تەحنولوگيالارىن باعالاۋدىڭ ءرولىن ارتتىرۋ مەن وعان قويىلاتىن تالاپتاردى وزگەرتۋ ماسەلەلەرى قارالىپ جاتىر.
بۇعان دەيىن ۇلتتىق ورتالىق باسشىسى قازاقستاندا دەنساۋلىق ساقتاۋعا جان باسىنا شاققاندا 133،5 مىڭ تەڭگەنى قۇرايتىنىن ايتتى.