2025 جىلدىڭ ءساۋىر ايىنان باستاپ قازاقستان رەسپۋبليكاسى وقۋ-اعارتۋ مينيسترلىگىنە قاراستى «دارىن» رەسپۋبليكالىق عىلىمي-پراكتيكالىق ورتالىعى دارىندى وقۋشىلار مەن پەداگوگتەردى قولداۋ ماقساتىندا SMART Daryn ۇلتتىق سيفرلىق پلاتفورماسىن ىسكە قوسادى، دەپ حابارلايدى aqshamnews.kz.
بۇل سيفرلىق جوبا رەسپۋبليكالىق جانە حالىقارالىق سايىستارعا وقۋشىلاردى دايىنداۋدىڭ ماڭىزدى قۇرالىنا اينالىپ، ءونلاين-بىلىم الۋ مەن تاجىريبەلى ترەنەرلەرمەن كەڭەسۋ مۇمكىندىگىن ۇسىنىپ، وقۋشىلارعا بىلىمدەرىن جەتىلدىرۋگە جانە ينتەللەكتۋالدىق بايقاۋلارعا دايىندىقتارىن ارتتىرۋعا كومەكتەسەدى.
ءبىرىنشى كەزەڭدە پروكتورينگ جۇيەسىن قولدانىپ ونلاين-وليمپيادالار مەن كونكۋرستار وتكىزۋ جوسپارلانىپ وتىر. الداعى ۋاقىتتا ونلاين-ساباقتار ۇيىمداستىرىلاتىن بولادى.
«پلاتفورما دارىندى وقۋشىلاردىڭ دامۋىنا جانە پەداگوگتەردىڭ بىلىكتىلىگىن ارتتىرۋعا جاڭا مۇمكىندىكتەر اشىپ، وقۋ پروسەسىنە زاماناۋي ءبىلىم بەرۋ تەحنولوگيالارىن ەنگىزۋگە ىقپال ەتەدى. ءبىز SMART Daryn جوباسى دارىندى وقۋشىلار ءۇشىن ساپالى ءبىلىم الۋدى ايتارلىقتاي جەڭىلدەتىپ، ءبىلىم بەرۋ جۇيەسىنىڭ بارلىق قاتىسۋشىلارى اراسىندا ءتيىمدى ءوزارا ارەكەتتەستىك ورناتاتىنىنا سەنىمدىمىز»، — دەيدى «دارىن» رعپو ديرەكتورى عاجدەمبەك تۇرسىنوۆ.
سونىمەن قاتار پلاتفورمادا دارىندى بالالارعا ارنالعان مامانداندىرىلعان ءبىلىم بەرۋ ۇيىمدارىنا ءتۇسۋ ءۇشىن ەمتيحاندار وتكىزۋ جوسپارلانعان. قازىرگى تاڭدا قازاقستاندا 130-دان استام مامانداندىرىلعان مەكتەپ بار.
سونداي-اق SMART Daryn پەداگوگتەر ءۇشىن ادىستەمەلىك ماتەريالدار مەن كەڭەستەردەن تۇراتىن ونلاين-كىتاپحانا ۇسىناتىن بولادى.