2022 جىلى دارىگەرلەردىڭ ورتاشا جالاقىسى 420 مىڭ تەڭگەگە دەيىن ءوستى.
بۇل تۋرالى دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz.
«مەملەكەت باسشىسىنىڭ تاپسىرماسى بويىنشا مەديسينا قىزمەتكەرلەرىن ىنتالاندىرۋ ماقساتىندا 2020 جىلدان باستاپ دارىگەرلەردىڭ جالاقىسىن جىل سايىن ارتتىرۋ شارالارى قولعا الىنۋدا. بۇل ونى 2023 جىلعا قاراي ەكونوميكاداعى ورتاشا جالاقىدان ەكى ەسە جوعارى دەڭگەيگە جەتكىزۋ ماقساتىندا جاسالىپ وتىر. 2022 جىلى دارىگەرلەردىڭ ورتاشا جالاقىسى ءقازىردىڭ وزىندە 421 مىڭ تەڭگەگە دەيىن ءوستى. ورتاشا مەديسينا قىزمەتكەرىنىڭ جالاقىسى شامامەن 235 مىڭ تەڭگەنى قۇرادى»، - دەدى اجار عينيات ۇكىمەت وتىرىسىندا.
مينيستر سونداي-اق ءمامس اياسىندا حالىقتىڭ قىمبات مەديسينالىق قىزمەتتەرگە قولجەتىمدىلىگى ارتقانىن حابارلادى. قازىرگى ۋاقىتتا 886 مىڭعا جۋىق قىمبات مەديسينالىق قىزمەت كورسەتىلدى.
«جوعارىدا اتالعان شارالاردى جۇزەگە اسىرۋدىڭ ارقاسىندا اۋىلدىق ەلدى مەكەندەردى العاشقى مەديسينالىق-سانيتارلىق كومەكپەن جانە كونسۋلتاتيۆتىك-دياگنوستيكالىق قىزمەتتەرمەن قامتۋ 49%-عا دەيىن ۇلعايتىلدى. مەديسينالىق كومەكتىڭ كەپىلدىك بەرىلگەن كولەمى مەن مىندەتتى مەديسينالىق ساقتاندىرۋ جۇيەسى اياسىندا امبۋلاتوريالىق دەڭگەيدە مەديسينالىق كومەك كورسەتۋ كولەمى 56 پايىزعا جەتكىزىلدى»، - دەدى ا.عينيات.