2024 جىلى قازاقستاندا دارى-دارمەكتەردى جانە بالاباقشالارعا كەزەكتى قاداعالاۋ بويىنشا جاڭا سيفرلىق جۇيەلەر ىسكە قوسىلادى.
ۇكىمەتتە وتكەن كەڭەستە ق ر پرەمەر-مينيسترى ءاليحان سمايىلوۆقا ءتيىستى سيفرلىق شەشىمدەر تانىستىرىلدى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
دارىلىك زاتتاردى قاداعالاۋ جۇيەسى بىرنەشە ماسەلەنى بىردەن شەشۋگە ىقپال ەتەدى. اتاپ ايتقاندا، مەديسينالىق ۇيىمداردا دارىلىك زاتتاردى قايتا جازۋ جانە وتىرىك ەسەپتەن شىعارۋ مۇمكىندىگىن جويىپ، دارىلىك زاتتاردىڭ بولشەك ساۋداداعى باعاسىنا، قالدىقتارىنا جانە جارامدىلىق مەرزىمدەرىنە مونيتورينگ جۇرگىزەدى.
تولىق قاداعالاۋ ماقساتىندا ءار قوراپقا ەكى ولشەمدى بىرەگەي Data Matrix كودى قولدانىلادى. ناتيجەسىندە رەسپۋبليكاداعى دارىلىك زاتتاردىڭ تولىق اينالىمىن وندىرىلگەن ساتتەن باستاپ قولدانىسقا دەيىن ونلاين باقىلاۋعا مۇمكىندىك تۋادى.
«جۇيە دارىلىك زاتتاردىڭ كولەڭكەلى ساۋداسىن ەداۋىر تومەندەتەدى جانە ولاردى ورتالىقتاندىرىلعان ساتىپ الۋدى ءتيىمدى جوسپارلاۋعا كومەكتەسەدى. جالپى پلاتفورمادا دارى-دارمەك قورىن تابلەتكا سانىنا دەيىن قاداعالاۋعا بولادى»، — دەدى دەنساۋلىق ساقتاۋ ۆيسە-مينيسترى بەيبىت ەسەنبايەۆ.
سونداي-اق اشىقتىقتى ارتتىرۋ ارقىلى ىقتيمال كونترافاكتىلىك ونىمدەردى انىقتاۋعا، سونداي-اق دارىلىك زاتتاردىڭ بەكىتىلگەن بولشەك ساۋدا باعالارىن باقىلاۋعا مۇمكىندىك تۋاتىنى اتاپ ءوتىلدى.
«جاڭا جۇيە ەل تۇرعىندارىن كونترافاكتىلىك ونىمدەردەن قورعايدى. تۇتىنۋشى ساتىپ العان دارى-دارمەكتىڭ زاڭدى ەكەنىنە جانە ولاردىڭ ءومىرى مەن دەنساۋلىعىنا ءقاۋىپسىز ەكەنىنە ەش كۇماندانباۋىنا بولادى»، — دەپ اتاپ ءوتتى پرەمەر-مينيستردىڭ ورىنباسارى تامارا دۇيسەنوۆا.
ءقازىر جوبا پيلوتتىق رەجيمدە جۇزەگە اسىرىلۋدا. قاداعالاۋ جۇيەسىن 2024 جىلدىڭ شىلدەسىنەن باستاپ ەنگىزۋ جوسپارلانعان.
پرەمەر-مينيستر پلاتفورمانىڭ بارىنشا ءتيىمدى بولۋى جانە اۋرۋحانالار، ەمحانالار، اۋىلدىق دەنساۋلىق ساقتاۋ مەكەمەلەرى مەن ءدارىحانالاردا قولدانۋعا ىڭعايلى بولۋى ءۇشىن ونىڭ بارلىق فۋنكسيونالدىعىن ەگجەي-تەگجەيلى پىسىقتاۋدى تاپسىردى.
بۇدان بولەك، ۇكىمەت باسشىسىنا بالاباقشالارعا كەزەككە تىركەۋدىڭ ءبىرىڭعاي دەرەكتەر بازاسى تانىستىرىلدى. ول اتا-انالارعا ىڭعايلى بولۋ ءۇشىن جانە مەكتەپكە دەيىنگى ۇيىمداردا ورىنداردى ءبولۋدىڭ تولىق اشىقتىعىن قامتاماسىز ەتۋ ءۇشىن جاسالعان.
اتاپ ايتقاندا، Egov.kz مەملەكەتتىك پورتالى نەمەسە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى بالانى كەزەككە قويۋ ءۇشىن بىردەن 4 بالاباقشاعا دەيىن تاڭداپ، كەيىن ونلاين رەجيمدە بەرىلگەن ءوتىنىشتىڭ مارتەبەسىن باقىلاۋعا بولادى. مەكەمەلەردىڭ بىرىندە ورىن بولا قالعان جاعدايدا دەرەۋ اتا-اناعا حابارلانادى. جالپى بالاباقشا تاڭداۋدان باستاپ، كەلىسىمشارت جاساسۋعا دەيىنگى بارلىق ءراسىم ەلەكتروندى فورماتتا وتەدى.
پرەمەر-مينيستر بۇل جۇيە مەكتەپكە دەيىنگى ۇيىمدارداعى قوسارلانعان كەزەكتى جانە سىبايلاس جەمقورلىق تاۋەكەلدەرىن جويۋعا باعىتتالۋى كەرەكتىگىن اتاپ ءوتتى.
اتالعان سيفرلىق شەشىم ءقازىر پيلوتتىق رەجيمدە پىسىقتالۋدا. ءبىرىڭعاي دەرەكتەر بازاسىن ىسكە قوسۋ 2024 جىلدىڭ قاڭتارىنا جوسپارلانعان.