سالىق رەجيمىنىڭ نەگىزگى مىندەتى – وسى سالانى قولداۋ، اينالىمداردى كولەڭكەدەن شىعارۋ جانە وسى سالاداعى ەڭبەك قاتىناستارىن زاڭداستىرۋ.
ۇلتتىق ەكونوميكا ءبىرىنشى ۆيسە-مينيسترى تيمۋر جاقسىلىقوۆ 2000 سالىق تولەۋشىنىڭ بولشەك سالىق رەجيمىنە كوشۋى تۋرالى بولجامعا تۇسىنىكتەمە بەردى، دەپ حابارلايدى Almaty-akshamy.kz. ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ.
وزدەرىڭىز بىلەتىندەي، اعىمداعى جىلعى 1 قاڭتاردان باستاپ بولشەك سالىق رەجيمى ەنگىزىلدى. قىزمەت تۇرلەرىنىڭ تىزبەسى اقپاندا بەكىتىلدى. سونداي-اق رەجيمدى قولدانۋعا ءوتىنىش نىسانىن دايىنداۋ قاجەت بولدى.
وسىعان بايلانىستى رەجيم ناۋرىزدان باستاپ قولدانىلا باستادى.
ياعني، رەجيم ءىس جۇزىندە تەك 3 اي جۇمىس ىستەيدى.
وسى كەزەڭدە 334 سالىق تولەۋشى تىركەلدى. 2000-نان استام سالىق تولەۋشىنىڭ رەجيمگە كوشۋى جونىندەگى بولجام 2 جىلعا جاسالدى (2021-2022 جىلدار).
رەجيمنىڭ پايداسى تۋرالى ءتۇسىندىرۋ جۇمىستارى جالعاساتىن بولادى. سالىق تولەۋشىلەر سانىنىڭ ءوسۋى كۇتىلۋدە.
قوعامدىق تاماقتانۋ سالاسىنداعى 115 سۋبەكتىگە وسى رەجيم قولدانىلادى.
6% مولشەرىندەگى مولشەرلەمە ققس جانە الەۋمەتتىك سالىق بويىنشا سالىق جۇكتەمەسى بولمايتىندىقتان تارتىمدى بولادى.
رەجيم اينالىمى ققس بويىنشا ەسەپكە قويۋ شەگىنەن اساتىن (30 مىڭ اەك – 87 ملن.تەڭگە) ادامدار ءۇشىن ءتيىمدى. رەجيمگە وتكەننەن كەيىن ولار ققس تولەمەيدى. سالىق شەگەرىمدەر مەن تۇزەتۋلەردى قولدانىلماي، قاراپايىم تاسىلمەن ەسەپتەلەدى.
3% مولشەرىندەگى قولدانىستاعى مولشەرلەمە ققس-تى الماستىرادى. مولشەرلەمە شاعىن بيزنەس سۋبەكتىلەرىنىڭ تابىسى سالىعىنان ءۇش جىل بوساتۋدى ەسكەرە وتىرىپ ايقىندالعان. مۇنداي مولشەرلەمە ولاردىڭ رەجيمگە ءوتۋىن ءتيىمدى ەتەدى.
2023 جىلى بوساتۋ مەرزىمى اياقتالادى. قولدانىستاعى مولشەرلەمەگە شاعىن بيزنەس سۋبەكتىلەرى ءۇشىن وڭايلاتىلعان دەكلاراسيا رەجيمىنىڭ 3% مولشەرىندەگى سالىق مولشەرلەمەسى قوسىلدى.
قوعامدىق تاماقتاندىرۋ سالاسىندا سالىق تولەۋشىلەر سانىن ارتتىرۋ بويىنشا ەسەپتەر جۇرگىزىلگەن جوق. رەجيمنىڭ ماقساتى بۇل ەمەس.
ءبىزدىڭ بولجامىمىز بويىنشا، 2023-2024 جىلدارى بيزنەس 18 ملرد.تەڭگە ۇنەمدەيدى.