زەينەت جاسىنا تولعاندا نەمەسە الەۋمەتتىك كودەكستە كوزدەلگەن وزگە دە جاعدايلار تۋىندعان كەزدە سالىمشى بجزق-دان تۇراقتى تولەمدەر الا باستايدى.
ءاربىر سالىمشىنىڭ جيناقتاۋشى زەينەتاقىسى ونىڭ زەينەتاقى جارنالارى جانە جيناقتالعان ينۆەستيسيالىق كىرىسى ەسەبىنەن قالىپتاستىرىلعان زەينەتاقى جيناقتارىنىڭ سوماسىنا تىكەلەي بايلانىستى، دەپ حابارلايدى aqshamnews.kz
ەستەرىڭىزگە سالا كەتەيىك، بجزق-دان بەرىلەتىن تولەمدەر قازاقستان رەسپۋبليكاسى ۇكىمەتىنىڭ 2023 جىلعى 30 ماۋسىمداعى قاۋلىسىمەن بەكىتىلگەن زەينەتاقى تولەمدەرىنىڭ مولشەرىن ەسەپتەۋ ادىستەمەسىنە سايكەس جۇزەگە اسىرىلادى.
ادىستەمەگە ساي، زەينەتكە شىعاتىن ازاماتتارعا اي سايىن جاسالاتىن تولەم بىلاي ەسەپتەلەدى: تولەم الا باستايتىن العاشقى جىلى زەينەتاقى جيناقتارىنىڭ سوماسى زەينەتاقى جيناقتارىنىڭ 6،5% تولەم مولشەرلەمەسىنە كوبەيتىلىپ، 12-گە بولىنەدى. ودان كەيىنگى جىلدارى اي سايىنعى تولەم زەينەتاقى تولەمدەرىن يندەكستەۋدىڭ 5% مولشەرلەمەسىنە ۇلعايىپ وتىرادى. بۇل رەتتە بجزق-دان بەرىلەتىن اي سايىنعى تولەم رەسپۋبليكالىق بيۋدجەت تۋرالى زاڭدا ءتيىستى قارجى جىلىنا بەلگىلەنگەن ەڭ تومەنگى كۇنكورىس دەڭگەيىنىڭ (بۇدان ءارى - كد) كەمىندە 70% مولشەرىندە جۇزەگە اسىرىلادى (2025 جىلعى ەڭ تومەنگى كۇنكورىس دەڭگەيى - 46 228 تەڭگە). قوردان بەرىلەتىن تولەمدەردىڭ ەڭ جوعارى مولشەرى شەكتەلمەيدى جانە الۋشىنىڭ زەينەتاقى جيناقتارىنىڭ سوماسىنا بايلانىستى.
"مەرزىمسىز ۋاقىتقا بەلگىلەنگەن 1 نەمەسە 2 توپتاعى مۇگەدەكتىگى بار ادامدار، سونداي-اق زيان جانە ءقاۋىپتى وندىرىستەردە جۇمىس ىستەپ، زەينەت جاسىنا تولعان، ولاردىڭ پايداسىنا جيىنتىعىندا كەم دەگەندە الپىس اي مىندەتتى كاسىپتىك زەينەتاقى جارنالارى تولەنگەن ادامدار سياقتى بەلگىلى ءبىر ساناتتاعى الۋشىلار ءۇشىن ادىستەمەدە اي سايىنعى زەينەتاقى تولەمىنىڭ مولشەرىن ارتتىراتىن تۇزەتۋ كوەففيسيەنتتەرى كوزدەلگەن. جوعارىدا كورسەتىلگەن شارتتاردىڭ بىرەۋىنەن ارتىعىن قاناعاتتاندىراتىن ادامدار ءۇشىن ەڭ ۇلكەن مانگە يە تۇزەتۋ كوەففيسيەنتى قولدانىلادى"، - دەلىنگەن حابارلامادا.
بجزق-دان بەرىلەتىن زەينەتاقى تولەمدەرى جەكە زەينەتاقى شوتىنداعى زەينەتاقى جيناقتارى تاۋسىلعانعا دەيىن جۇزەگە اسىرىلادى. جەكە زەينەتاقى جيناقتارى سالىمشىنىڭ مەنشىگى بولعاندىقتان، ولار ازاماتتىق زاڭنامادا كوزدەلگەن جالپى تارتىپپەن مۇراعا دا قالدىرىلادى.