بيتۋمنىڭ جيىنتىق ءوندىرىسىن جىلىنا 1،2 ملن تونناعا دەيىن ۇلعايتۋعا بولادى.
ق ر ەنەرگەتيكا ءمينيسترى بولات اقشولاقوۆ ۇكىمەت وتىرىسىندا ەلىمىزدە بيتۋم ءوندىرۋ كولەمى ارتاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«2022 جىلى بيتۋممەن قامتاماسىز ەتۋگە توقتالساق، قازاقستان اۋماعى 3 ايماققا بولىنگەن. باتىس وڭىرلەر بويىنشا ءوندىرۋ جىلىنا 500 مىڭ توننا بولعان كەزدە، ەڭ تومەنگى قاجەتتىلىك 191 مىڭ توننا دەڭگەيىندە. سولتۇستىك-شىعىس وڭىرلەردە 308 مىڭ توننا قاجەتتىلىك ءوزىنىڭ جىلىنا 300 مىڭ توننا ءوندىرۋى كولەمىمەن جابىلادى. وڭتۇستىك وڭىرلەر بويىنشا ءوندىرۋ جىلىنا 374 مىڭ توننا بولعان كەزدە، ەڭ جوعارى قاجەتتىلىك 602 مىڭ توننا شاماسىندا. قازاقستان رەسپۋبليكاسىنىڭ بيتۋمعا دەگەن جالپى قاجەتتىلىگى 1،1 ملن توننانى قۇرايدى»، - دەدى بولات اقشولاقوۆ.
وسى ورايدا ول بيتۋم ءوندىرىسىن ۇلعايتۋ ماسەلەسىنە توقتالدى.
«جۇمىس ىستەپ تۇرعان زاۋىتتاردى قوسىمشا جۇكتەۋ ەسەبىنەن ەلدەگى بيتۋمنىڭ جيىنتىق ءوندىرىسىن جىلىنا 1،2 ملن تونناعا دەيىن ۇلعايتۋ مۇمكىن بولادى. CaspiBitum قاراجانباس مۇنايىن وڭدەۋ ەسەبىنەن جىلىنا 500 مىڭ تونناعا دەيىن (+ 94 مىڭ توننا)، ال Qazaq Bitum رەسەي گۋدرونىنىڭ يمپورتى ەسەبىنەن جىلىنا 374 مىڭ تونناعا دەيىن (+ 200 مىڭ) جەتكىزەدى. جول-قۇرىلىس كومپانيالارى قىسقى-كوكتەمگى كەزەڭدە يندۋستريا جانە ينفراقۇرىلىمدىق دامۋ مينيسترلىگىنىڭ ءبىرىڭعاي ساتىپ الۋشىسى ارقىلى قوسىمشا بيتۋم كولەمدەرىن ساتىپ الۋدى جوسپارلاۋى ءتيىس. جول-قۇرىلىس جۇمىستارىنىڭ قۇنى بيتۋم باعاسىنىڭ كونيۋنكتۋراسىنا ساي بولۋى ءتيىس»، - دەدى ۆەدومستۆو باسشىسى.