ازىق-تۇلىك اراسىندا كوكونىس باعاسى ايتارلىقتاي وسكەن.
وتكەن ايدا ازىق-تۇلىك تاۋارلارى 1،6%، ازىق-تۇلىككە جاتپايتىن تاۋارلار 1،3%، اقىلى قىزمەتتەر 0،5%-عا قىمباتتادى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ازىق-تۇلىك اراسىندا كوكونىس باعاسى ايتارلىقتاي وسكەن، جەلتوقساندا قيار 35،6%، قىزاناق 14،6%، ءتاتتى بۇرىش 8،4%، پياز 7،9%، قىزىلشا 3،8% قىمباتتادى.
قۇمشەكەر 3،8%، ليمون 0،9% ارزاندادى.
ازىق-تۇلىككە جاتپايتىن تاۋارلاردىڭ ىشىندە جەلتوقسان ايىندا تەحنيكا باعاسى ايتارلىقتاي جوعارىلاعان.
ماسەلەن، 2022 جىلعى قاراشامەن سالىستىرعاندا، سىمسىز قۇلاققاپتار 7،7%، پلانشەت 6،3%، ەلەكترلى جىلىتقىشتار 6،1%، نوۋتبۋكتەر 3،7% قىمباتتادى.
ىدىس جۋۋعا ارنالعان قۇرالداردىڭ باعاسى 4،5%، كىر جۋعىش ۇنتاقتىكى 4% ءوستى.
وتكەن ايدا اقىلى قىزمەتتەردىڭ باعاسى 0،5% ءوستى. تۋريستەردىڭ مەديسينالىق ساقتاندىرۋ قىزمەتى 7،3%، كولىك جۋۋ قىزمەتى 3،8% قىمباتتادى.
كوممۋنالدىق قىزمەتتەر بويىنشا تاريفتەردىڭ تومەندەۋى ورتالىقتان جىلىتۋ (1 گكال) مەن ىستىق سۋعا (1 م3) بايقالدى – ءارقايسىسى 0،4%-دان.
وڭىرلەر اراسىندا ەڭ جوعارى ايلىق ينفلياسيا قوستاناي جانە جامبىل وبلىستارىندا تىركەلدى – ءارقايسىسىندا 1،9%-دان (رەسپۋبليكالىق ورتاشا دەڭگەيدەن 0،7 پ.ت. جوعارى)، ەڭ تومەنى شىمكەنت قالاسى مەن ماڭعىستاۋ وبلىسىندا – ءارقايسىسىندا 0،7%-دان.
وڭىرلەر بولىنىسىندە ازىق-تۇلىك تاۋارلارىنىڭ ەڭ كوپ قىمباتتاۋى قوستاناي جانە جامبىل وبلىستارىندا بايقالدى – 2،5%-دان، ازىق-تۇلىككە جاتپايتىن تاۋارلار قوستاناي وبلىسىندا – 2،2%، اقىلى قىزمەتتەر جەتىسۋ وبلىسىندا – 1،7%.
2022 جىلعى جەلتوقساندا جىلدىق ماندە ينفلياسيا دەڭگەيى 20،3% قۇرادى.
ازىق-تۇلىك تاۋارلارىنىڭ باعاسى 25،3%-عا، ازىق-تۇلىككە جاتپايتىن تاۋارلار 19،4%-عا، اقىلى قىزمەتتەر 14،1%-عا ءوستى.
2021 جىلعى جەلتوقسانمەن سالىستىرعاندا شاقپاق قانت 92،7%، كىر سابىن 87،6%-عا، كەڭسە تاۋارلارى 70،3% قىمباتتادى.
كەرىسىنشە، جىلدىق ماندە سۇيىتىلعان گاز (باللوندارداعى) 23%-عا، قىرىققابات 15،2%-عا ارزاندادى.
2022 جىلعى قاڭتاردان باستاپ تۇتىنۋ باعاسىنىڭ يندەكسىن جاساۋ كەزىندە ازىق-تۇلىك تاۋارلارىنىڭ ۇلەسى 40،7%، ازىق-تۇلىككە جاتپايتىن تاۋارلاردىڭ ۇلەسى 30،2%، اقىلى قىزمەتتەردىكى 29،1% قۇرايدى.