“قاراسورا” ارنايى وپەراسياسىنىڭ سوڭعى اپتاسىندا تۇركىستان، جامبىل، قاراعاندى، باتىس قازاقستان وبلىستارىندا، سونداي-اق الماتى جانە استانا قالالارىندا 110 ەسىرتكى قۇقىق بۇزۋشىلىعى انىقتالدى. 125 قىلمىسكەر ۇستالدى. 250 كگ ەسىرتكى، ونىڭ ىشىندە 238 كگ ماريحۋانا، 2 كگ گاشيش جانە 10 كگ سينتەتيكا تاركىلەندى، – دەپ حابارلايدى almaty-akshamy.kz Polisia.kz سىلتەمە جاساپ.
قاراعاندى قالاسىنا كىرە بەرىستە استانانىڭ 35 جاستاعى تۇرعىنى ۇستالدى، ونىڭ كولىگىنەن 2،7 كگ مەفەدرون تاركىلەندى.
شىمكەنتتە جەرگىلىكتى تۇرعىننىڭ كولىگىنەن 3،2 كگ مەفەدرون تابىلدى.
الماتىدا Skoda اۆتوكولىگىنىڭ سالونىن ءتىنتۋ كەزىندە 6 كگ گاشيش تاركىلەندى.
سونىمەن قاتار باتىس ەۋروپا – باتىس جۇڭگو اۆتوجولىندا Sساnia جۇك كولىگى توقتاتىلىپ، 4 كەلىدەن استام ماريحۋانا انىقتالدى. كۇدىكتىنىڭ تۇرعىلىقتى جەرىندە تاعى 136 كگ ەسىرتكى تابىلدى.
جامبىل وبلىسىنىڭ شۋ اۋدانىندا جەرگىلىكتى تۇرعىن ۇستالىپ، ودان 67 كگ ماريحۋانا تاركىلەندى. ۇستالعان ادامنىڭ ايتۋىنشا، ول باقىلاۋدىڭ ازايۋىن كۇتىپ، ەسىرتكىنى قىستا تاسىمالداۋدى جوسپارلاعان. دەمالىس كۇندەرى دە بۇل جۇمىس جالعاستى.
استانادا جەرگىلىكتى تۇرعىننىڭ پاتەرىن ءتىنتۋ كەزىندە 1،5 كگ مەفەدرون تاركىلەندى.
ال تەمىرتاۋدا 22 جاستاعى ەسىرتكى جاسىرۋشى ۇستالدى. ودان 350 گرامم مەفەدرون سالىنعان 300 تۇيىنشەك تاركىلەندى.
– بارلىق فاكتى بويىنشا سوتقا دەيىنگى ءىس جۇرگىزۋ باستالدى. جوعارىدا اتالعان قىلمىستار ءۇشىن مۇلكى تاركىلەنىپ، ون بەس جىلعا دەيىن باس بوستاندىعىنان ايىرۋ جازاسى كوزدەلەدى. جىل باسىنان بەرى ىشكى ىستەر ورگاندارى بارلىعى 6 217 قۇقىق بۇزۋشىلىقتى انىقتادى. 32،5 توننا ءتۇرلى ەسىرتكى، ونىڭ ىشىندە 5،8 توننا ماريحۋانا، 62 كگ گەروين، 270 كگ سينتەتيكالىق ەسىرتكى تاركىلەندى. ەسىرتكى بيزنەسىمەن اينالىسقان 12 ۇيىمداسقان قىلمىستىق توپتىڭ، ونىڭ ىشىندە ءۇش ترانسۇلتتىق توپتىڭ قىزمەتى توقتاتىلدى. ەسىرتكى توپتارىنىڭ 14 كوشباسشىسى جانە 52 مۇشەسى ۇستالدى، ولاردىڭ ىشىندە شەتەلدىك ازاماتتار دا بار. 40 ەسىرتكى زەرتحاناسى جويىلدى، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى سارقىتباي قۇسايىنوۆ.