«تۇرعىلىقتى جەرىنە قاراماستان، ءاربىر بالانىڭ ءبىلىم الۋىنا قولايلى جاعداي جاساۋ – مەملەكەتتىڭ مىندەتى»
قاسىم - جومارت توقايەۆ، قازاقستان رەسپۋبليكاسىنىڭ پرەزيدەنتى
قازاقستاندا تۇرعىلىقتى جەرىنە قاراماستان ءاربىر بالانىڭ ساپالى ءبىلىم الۋى ءۇشىن قولايلى، ءقاۋىپسىز ءارى جايلى جاعدايلار جاساۋعا باعىتتالعان تۇراقتى مەملەكەتتىك ساياسات جۇرگىزىلىپ كەلەدى. بۇعان سوڭعى جىلدارى جۇزەگە اسىرىلىپ جاتقان اۋقىمدى مەملەكەتتىك باعدارلامالار دا ىقپال ەتۋدە، دەپ حابارلايدى aqshamnews.kz
ەلدە جاڭا مەكتەپتەردىڭ قۇرىلىسى بۇرىن-سوڭدى بولماعان قارقىنمەن ءجۇرىپ جاتىر. مەملەكەت باسشىسىنىڭ تاپسىرماسى بويىنشا بيىل ءتورتىنشى جىل قاتارىنان جىل سايىن 1000-عا جۋىق اۋىل مەكتەپتەرى مودەرنيزاسيادان وتۋدە. بۇل بالالار ءۇشىن وقۋ جاعدايلارىن جاقسارتۋعا عانا ەمەس، سونىمەن قاتار قالا مەن اۋىل مەكتەپتەرى اراسىنداعى ءبىلىم بەرۋ ساپاسىنداعى الشاقتىقتى ازايتۋعا مۇمكىندىك بەرەدى.
سوڭعى ءۇش جىلدا 4 مىڭنان استام مەكتەپتىڭ ماتەريالدىق-تەحنيكالىق بازاسى جاڭارتىلدى. 2 مىڭنان استام ءبىلىم بەرۋ ۇيىمىندا روبوتوتەحنيكا، حيميا، بيولوگيا، فيزيكا جانە STEم بويىنشا زاماناۋي پاندىك كابينەتتەر اشىلدى. ءبىر عانا 2024 جىلدىڭ قورىتىندىسىن الىپ قارار بولساق، 967 مەكتەپتە 1621 پاندىك كابينەت جابدىقتالدى. بۇل باعىتتاعى جۇمىستار ءالى دە جالعاسۋدا، 2029 جىلعا قاراي ەلىمىزدىڭ مەكتەپتەرىندە كەمىندە 7000 زاماناۋي پاندىك كابينەت اشۋ جوسپارلانعان.
ءبىلىم بەرۋ ساپاسىن ارتتىرۋدىڭ تاعى ءبىر ماڭىزدى فاكتورى - سيفرلىق تەحنولوگيالاردى ەنگىزۋ بولىپ تابىلادى. ۇلتتىق باستامالار اياسىندا مەكتەپ وقۋلىقتارىنىڭ 100%-ى سيفرلىق فورماتقا كوشىرىلدى، ال مەكتەپتەردىڭ 95،2%-دا جوعارى جىلدامدىقتى ينتەرنەتكە قولجەتىمدىلىك ايتارلىقتاي جاقساردى. ءبىلىم بەرۋ پلاتفورمالارى ەنگىزىلۋدە، جاساندى ينتەللەكت ەلەمەنتتەرى وقۋ پروسەسىنە ينتەگراسيالانۋدا. وسى شارالاردىڭ بارلىعى وقۋشىلاردى بولاشاقتىڭ سىن-قاتەرلەرىنە دايىنداۋعا جانە ولاردىڭ بويىندا ەرتە جاستان سيفرلىق داعدىلاردى قالىپتاستىرۋعا باعىتتالعان.
ءبىلىم بەرۋ ساپاسى پەداگوگيكالىق قاۋىمداستىقتىڭ كاسىبيلىك دەڭگەيىمەن دە تىكەلەي بايلانىستى. وسى تۇرعىدا مەملەكەت تاراپىنان مۇعالىمدەردى تۇراقتى تۇردە قولداۋ، ولاردىڭ مارتەبەسىن، ماتەريالدىق الەۋەتىن ارتتىرۋ بويىنشا اتقارىلىپ جاتقان جۇمىستاردى دا اتاپ ءوتۋ كەرەك. 2020 جىلدان باستاپ پەداگوگتەردىڭ جالاقىسى 2 ەسەگە ارتتى، ال بىلىكتىلىك ساناتتارى بار مۇعالىمدەرگە ول ءۇشىن لاۋازىمدىق جالاقىسىنىڭ 35%-دان 50%-عا دەيىن ۇستەمەاقى تولەنەدى. بۇگىندە ورتا ءبىلىم بەرۋ جۇيەسىندە جۇمىس ىستەيتىن 400 مىڭ پەداگوگتىڭ 300 مىڭعا جۋىعىنا وسىنداي ۇستەمەاقىلار تولەنىپ كەلەدى.
اۋىل مۇعالىمدەرىن قولداۋعا ەرەكشە نازار اۋدارىلۋدا، ولاردىڭ جالاقىسى قالالارداعى ارىپتەستەرىمەن سالىستىرعاندا كەم دەگەندە 25%-عا جوعارى. بۇل وڭىرلەرگە بىلىكتى كادرلاردى تارتۋعا ىقپال ەتەدى.
2023 جىلدىڭ قىركۇيەگىنەن باستاپ پرەزيدەنتتىڭ تاپسىرماسى بويىنشا بارلىق باستاۋىش سىنىپ جانە الەۋمەتتىك وسال توپتار ساناتىنداعى وقۋشىلاردى تەگىن ىستىق تاماقپەن قامتۋ ەنگىزىلدى. 1،7 ميلليون وقۋشىنى قامتاماسىز ەتۋگە جەرگىلىكتى بيۋدجەتتەردەن 192 ملرد تەڭگەدەن استام قاراجات ءبولىندى. سونداي-اق تاماقتانۋ ساپاسىن ارتتىرۋ ماقساتىندا اسحانا قىزمەتكەرلەرىنە قويىلاتىن تالاپتار كۇشەيتىلدى، تەگىن تاماق الۋشىلاردىڭ ەسەبى اۆتوماتتاندىرىلدى، كۇندەلىكتى باقىلاۋ ەنگىزىلدى.
سونىمەن قاتار «جالپىعا بىردەي ءبىلىم بەرۋ» قورى اياسىندا الەۋمەتتىك وسال ساناتتاعى 510 مىڭنان استام وقۋشى مەكتەپ قۇرالدارىمەن قامتاماسىز ەتىلگەن.
2025 جىلدان باستاپ جەكەمەنشىك مەكتەپتەردىڭ وقۋشىلارى ءۇشىن دە الەۋمەتتىك قولداۋ شارالارىن ەنگىزۋ كوزدەلۋدە.