ۇكىمەت مۇشەلەرى شەتەلدىك ينۆەستورلارمەن كەزدەسۋ وتكىزدى.
قازاقستان ۇكىمەتىنىڭ مۇشەلەرى مەملەكەت پرەزيدەنتىنىڭ تاپسىرماسىن ورىنداۋ ماقساتىندا ءبىلىم بەرۋ سالاسىنداعى شەتەلدىك ينۆەستورلارمەن كەزدەسۋ وتكىزدى، دەپ حابارلايدى Almaty-akshamy.kz.
«مەملەكەت باسشىسى قاسىم-جومارت توقايەۆتىڭ 11 قاڭتاردا پارلامەنت ءماجىلىسىنىڭ وتىرىسىندا جەتەكشى شەتەلدىك جوعارى وقۋ ورىندارىنىڭ كامپۋستارىن اشۋ تۋرالى بەرگەن تاپسىرماسىن ورىنداۋ ماقساتىندا بۇگىن پرەمەر-مينيستردىڭ ورىنباسارى ەرالى توعجانوۆ ءبىلىم بەرۋ سالاسىنداعى شەتەلدىك ينۆەستورلارمەن كەزدەسۋ وتكىزدى»، - دەلىنگەن Primeminister.kz cايتىندا.
كەزدەسۋگە مۇددەلى مەملەكەتتىك ورگانداردىڭ وكىلدەرى جانە «استانا» حالىقارالىق قارجى ورتالىعى باسقارۋشىسى قايرات كەلىمبەتوۆ قاتىستى.
بريتاندىق جانە رەسەيلىك شەتەلدىك تەحنيكالىق جوعارى وقۋ ورىندارىنىڭ ەكى فيليالىن اشۋ مۇمكىندىگى قاراستىرىلدى، ولاردىڭ ءبىرى احقو الاڭىندا اشىلادى.
فيليالداردا وقىتۋ كادرلار دايارلاۋدىڭ باسىم باعىتتارى بويىنشا، سونداي-اق ەل ەكونوميكاسىنىڭ قاجەتتىلىگىن ەسكەرە وتىرىپ جۇزەگە اسىرىلاتىن بولادى.
ق ر پرەمەر-مينيسترىنىڭ ورىنباسارى ەرالى توعجانوۆ قازاقستاندىق تاراپتىڭ بەدەلدى شەتەلدىك ۋنيۆەرسيتەتتەردىڭ فيليالدارىن اشۋعا قاجەتتى كومەك كورسەتۋگە دايىن ەكەنىن اتاپ ءوتتى.
ۆيسە-پرەمەر ءبىلىم جانە عىلىم مينيسترلىگىنە شەتەلدىك ۋنيۆەرسيتەتتەردىڭ ۇسىنىستارىن ەگجەي-تەگجەيلى زەردەلەي وتىرىپ، الەۋەتتى ينۆەستورلارمەن كەلىسسوزدەردى جەدەلدەتۋ جونىندە ناقتى تاپسىرمالار بەردى.
سونداي-اق اۆستريا مەن تۇركيا رەسپۋبليكاسىنىڭ ينۆەستيسيالىق كومپانيالارىنىڭ وكىلدەرىمەن دەنساۋلىق ساقتاۋ سالاسىنداعى ينۆەستيسيالىق جوبالاردى ىسكە اسىرۋ ماسەلەلەرى بويىنشا كەزدەسۋ وتكىزىلدى.
كەلىسسوزدەر بارىسىندا كوپبەيىندى اۋرۋحانا اشۋ، سونداي-اق قازاقستاننىڭ دەنساۋلىق ساقتاۋ سالاسىندا يننوۆاسيالىق شەشىمدەردى قولدانۋ مۇمكىندىكتەرى قارالدى.
كومپانيالاردىڭ ۇسىنىستارىن دەنساۋلىق ساقتاۋ مينيسترلىگى مۇددەلى مەملەكەتتىك ورگاندارمەن بىرلەسىپ قارايتىن بولادى.