شارا بارىسىندا كۇشتەر مەن قۇرالداردىڭ ەل ىشىندە قوزعالىسى ورىن الادى.
قازاقستاننىڭ قورعانىس مينيسترلىگى ەلدە «باتىل تويتارىس – 2022» كەشەندى ۆەدومستۆوارالىق ستراتەگيالىق كوماندالىق-شتابتىق وقۋ-جاتتىعۋى جالعاسىپ جاتقانىن جەتكىزدى. اتالعان شارا بيىلعى ءساۋىر ايىندا وتەدى، دەپ حابارلايدى Almaty-akshamy.kz.
«وقۋ-جاتتىعۋ مەملەكەت باسشىسى – قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ ارميانىڭ جاۋىنگەرلىك قابىلەتىن تۇبەگەيلى ارتتىرۋ، كۇشتىك قۇرىلىمداردى ءتيىمدى ۇيلەستىرۋدى قامتاماسىز ەتۋ، ولاردىڭ جەدەل جانە اسكەري-تەحنيكالىق ۇيلەسىمدىلىگىن جولعا قويۋ جونىندەگى تاپسىرمالارىن ىسكە اسىرۋ شەڭبەرىندە وتكىزىلەدى»، - دەلىنگەن قورعانىس مينيسترلىگىنىڭ حابارلاماسىندا.
وقۋ-جاتتىعۋ بارىسىندا كۇشتەر مەن قۇرالداردىڭ ەل ىشىندە قوزعالىسى ورىن الادى. بولىمشەلەر وقۋ-جاۋىنگەرلىك تاپسىرمالاردى پىسىقتاۋ ءۇشىن پوليگوندارعا مارش جاساپ، سودان كەيىن تۇراقتى ورنالاسۋ پۋنكتتەرىنە ورالادى.
جاتتىعۋ اقتوبە، الماتى، اتىراۋ، جامبىل، قىزىلوردا، ماڭعىستاۋ، تۇركىستان سەكىلدى جەتى وبلىستىڭ، سونداي-اق رەسپۋبليكالىق ماڭىزى بار الماتى جانە شىمكەنت قالالارىنىڭ اۋماعىندا وتەدى.
الماتى اۆياسيالىق بازاسىنداعى اسكەري اۆياسيانىڭ ۇشقىشتارى مي-17 كولىكتىك-جاۋىنگەرلىك تىكۇشاقتارىندا جانە مي-35م جاۋىنگەرلىك تىكۇشاقتارىندا ارنايى وپەراسيالار كۇشتەرىنىڭ تاكتيكالىق دەسانتىن وقۋ-جاۋىنگەرلىك تاپسىرمالاردى پىسىقتايتىن اۋداندارعا جەتكىزۋ مەن الىپ ءجۇرۋدى ورىندايدى.
جوسپار بويىنشا اسكەري-كولىك اۆياسياسىنىڭ ەكيپاجدارى س-295 ۇشاقتارىمەن قارۋلى كۇشتەردىڭ بولىمشەلەرىن ماڭعىستاۋ وبلىسىنا جەتكىزۋدى جۇزەگە اسىرادى. ولار «اقتاۋ-جاڭاوزەن» اۆتوموبيل جولىنىڭ اۋەايلاعىنا قوناتىن بولادى. ارنايى وپەراسيالار كۇشتەرىنىڭ اسكەري قىزمەتشىلەرى ماڭعىستاۋ وبلىسىنىڭ «ويماشا» پوليگونىندا وقۋ-جاۋىنگەرلىك تاپسىرمالاردى پىسىقتايدى. وقۋ-جاتتىعۋ اياقتالعاننان كەيىن بولىمشەلەر ۇشاقتارمەن تۇراقتى ورنالاسۋ پۋنكتتەرىنە قايتارىلادى.
بيىل 6-7 ساۋىردە تۇنگى ۋاقىتتا لەكتەردىڭ قوزعالىسى كەلەسى كەستەدە جۇزەگە اسىرىلعانىن اتاپ ءوتۋ قاجەت:
– «وڭتۇستىك» وڭىرلىك قولباسشىلىعىندا – تاراز قالاسىنداعى اسكەري بولىمنەن تەحنيكا «ءماتىبۇلاق» پوليگونىنا جىبەرىلدى؛
– «شىعىس» وڭىرلىك قولباسشىلىعىندا – سەمەي قالاسىنىڭ اسكەري بولىمىنەن اياگوز قالاسىنىڭ اسكەري بولىمىنە، ودان ءارى «مايلين» پوليگونىنا جونەلتىلدى؛
– الماتى جانە تالدىقورعان گارنيزوندارى اسكەري بولىمدەرىنىڭ جەكە قۇرامى اسكەري اۆياسيا تىكۇشاقتارىنىڭ بۇركەمەلەۋىمەن «ىلە» پوليگونىنا، قاپشاعاي گارنيزونىنىڭ اسكەري بولىمدەرىنىڭ جەكە قۇرامى «شوشقالى» پوليگونىنا جىبەرىلدى.