قايتالاما نارىقتاعى ءۇي باعاسى سول كۇيىندە قالۋى مۇمكىن.
قازاقستان ريەلتورلارىنىڭ بىرىككەن قاۋىمداستىعى پرەزيدەنتىنىڭ كەڭەسشىسى نينا لۋكيانەنكو تۇرعىن ءۇي نارىعىنداعى احۋال تۋرالى پىكىر ءبىلدىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«مامىلەلەر جەتكىلىكتى ءارى تۇراقتى كولەمدە جاسالىپ جاتىر. قازاقستان بويىنشا اي سايىنعى مامىلەلەردىڭ جالپى سانى 35 مىڭ دەڭگەيىندە قالادى دەپ بولجاۋعا بولادى. ايىرماشىلىق 2-3 مىڭنىڭ كولەمىندە»، - دەيدى نينا لۋكيانەنكو.
ساراپشى جىلجىمايتىن مۇلىككە سۇرانىس ايتارلىقتاي جوعارى ەكەنىن ايتادى.
«ءبىزدىڭ ەلدە تۇرعىن ۇيگە دەگەن سۇرانىس جوعارى بولىپ قالا بەرەدى - حالىقتىڭ تابيعي ءوسىمى مەن كوشى-قون قارقىنى وڭ»، - دەيدى ول.
مامان قايتالاما نارىقتاعى جىلجىمايتىن مۇلىك ۇسىنىستارى جوعارى بولعاندىقتان، ونىڭ باعاسى كوتەرىلمەيدى دەپ بولجايدى.
ال باستاپقى نارىقتا ۇسىنىس ازايۋى مۇمكىن.
«جاڭا جوبالار سانىنىڭ ايتارلىقتاي تومەندەۋى، سونداي-اق قۇرىلىس ماتەريالدارىنىڭ قىمباتتاۋى باستاپقى نارىقتا تۇرعىن ءۇي باعاسىن كوتەرۋى مۇمكىن. ساتۋ بولىمدەرىندە ۇلكەن كەزەك بولماعاندىقتان، قۇرىلىس كومپانيالارى ءتۇرلى اكسيالاردى ۇسىنىپ جاتىر»، - دەپ ءتۇسىندىردى نينا لۋكيانەنكو.
ۇلتتىق ستاتيستيكا بيۋروسىنىڭ مالىمەتىنە سۇيەنسەك، 2022 جىلعى قاراشاداعى جاعداي بويىنشا، قايتالاما نارىقتاعى پاتەرلەردىڭ باعاسى 12 ايدا 26،9%، جاڭا تۇرعىن ءۇيدىڭ باعاسى 17،3% وسكەن. 2022 جىلدىڭ قاراشاسىندا كوپ قاباتتى تۇرعىن ءۇي جالداۋ اقىسى وتكەن جىلمەن سالىستىرعاندا 48،6%-عا ارتقان.