پاندەمياعا بايلانىستى كوپ ادامنىڭ باسپانا ماسەلەسىنە قاتىستى كوزقاراسى مەن ۇستانىمى وزگەردى
ەلىمىزدە تۇرعىن ءۇيدىڭ باعاسىنا تىكەلەي اسەر ەتەتىن نەگىزگى فاكتورلار اتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الدىمەن باعاعا اسەر ەتەتىن ول – ينفلياسيا. ەكىنشى فاكتور – حالىقتىڭ دەموگرافيالىق كورسەتكىشى. وتكەن جىلى قازاقستاندا 450 مىڭ بالا دۇنيەگە كەلدى. بۇل رەكوردتىق كورسەتكىش. تۋۋ كورسەتكىشىنىڭ وسۋىنە قاراپ، قازاقستاندىقتاردىڭ بولاشاعىنا دەگەن نىق سەنىمدى بايقاۋعا بولادى. وتباسى مۇشەلەرى ارتقان سايىن تۇرعىن ءۇيدىڭ دە اياسىن كەڭەيتۋ ماسەلەسى تۋىندايدى»،- دەدى «وتباسى بانك» اق-نىڭ باسقارما ءتوراعاسى ءلاززات يبراگيموۆا ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
بانك باسشىسى كەلتىرگەن مالىمەتكە سايكەس، تۇرعىن ءۇي باعاسىنا اسەر ەتەتىن ءۇشىنشى فاكتور – الەمدەگى الەۋمەتتىك تەندەنسيا.
«پاندەمياعا بايلانىستى كوپ ادامنىڭ باسپانا ماسەلەسىنە قاتىستى كوزقاراسى مەن ۇستانىمى وزگەردى. ادامدار قاشىقتان جۇمىس ىستەۋگە كوشتى. بۇل ءوز ءۇيى بولۋىنىڭ ماڭىزدىلىعىن ارتتىرا ءتۇستى. سونداي-اق ءتورتىنشى فاكتور – تۇرعىن ءۇي ماسەلەسىن شەشۋدە زەينەتاقى قورىنداعى جيناقتى قولدانۋ مۇمكىندىگى. ارينە، ءقازىر زەينەتاقى جيناعىن قولدانۋ مۇمكىندىگى تومەندەدى. ءساۋىر ايىنىڭ قورىتىندىسى بويىنشا 20 پايىزعا ازايدى. بيىلعى جارتى جىلداعى ەسەپ بويىنشا ەلىمىزدە باسپانا باعاسىنىڭ ءوسۋى باياۋلايدى دەپ ويلايمىن. ءبىراق باعانىڭ ايتارلىقتاي تومەندەۋى مۇمكىن ەمەس»، - دەيدى ول.