وندا سىزگە قاتىستى اقپارات بار
قازاقستان پاسپورتىنداعى چيپ قۇجاتتىڭ حالىقارالىق ستاندارتقا ساي ەكەنىن بىلدىرەدى. بۇل تۋرالى ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين اقتوبەلىكتەرمەن كەزدەسۋىندە ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الەۋمەتتىك جەلىدە قازاقستان پاسپورتىنداعى چيپكە قاتىستى ءارقيلى بولجام ايتىلىپ جاتىر. بۇعان دەيىن ق ر ىشكى ىستەر مينيسترلىگى بۇل ماسەلە بويىنشا اقپارات بەرگەن بولاتىن.
بۇگىن اقتوبەگە كەلگەن ق ر سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين دە ءچيپتىڭ ورناتىلۋ سەبەبىن ءتۇسىندىردى.
«پاسپورتتاعى چيپكە قاتىستى ايتارىم، ازاماتتاردىڭ ساۋاتتىلىعىن كوتەرۋ كەرەك ەكەنىن كورىپ وتىرمىز. ونىڭ ەشقانداي زيانى جوق. زاعيپا بالييەۆا ادىلەت ءمينيسترى بولعان كەزدە ICAO ستاندارتتارىنا ساي بولۋ ءۇشىن جۇمىس اتقارىلدى. «حالىقارالىق قۇجاتقا چيپ ەنگىزىلۋى كەرەك» دەگەن ەسكەرتۋ 2000 جىلدارى كەلگەن. ستاندارتقا ساي بولۋ ءۇشىن پاسپورت دايىنداۋ پروسەسىنە وزگەرىس ەنگىزدىك. ول بانكتىڭ ءچيپى سياقتى. وندا سىزگە قاتىستى اقپارات بار. اقپاراتتى اۋەجايداعى، باسقا جەردە وتىرعان مەملەكەتتىك قىزمەتكەرلەر قارايدى. «پاسپورت جانىمدا، قايدا جۇرگەنىمىزدى باقىلاپ وتىرادى» دەپ ۋايىمداماڭىز. ول قاداعالاۋ ءۇشىن جاسالعان نارسە ەمەس. ول پاسپورتتىڭ حالىقارالىق ستاندارتقا ساي ەكەنىن بىلدىرەدى»، - دەدى باعدات مۋسين.
سونىمەن بىرگە مينيستر 5G-گە قاتىستى دا تۇسىنىك بەردى.
«5G اعزامىزعا زيان دەپ تە ايتىپ جاتىر. ايتارىم – دۇنيەجۇزى قارقىندى دامىپ كەلەدى. دامۋ ءۇشىن ءبىز دە تەحنولوگياعا بەيىمدەلۋىمىز كەرەك. جاڭا تەحنولوگيانى ەنگىزۋدە ءسال كەشىكسەك، ەكونوميكامىز دا، قاۋىپسىزدىگىمىز دە قالادى. سوندىقتان بەيىمدەلىپ، العا جىلجۋىمىز قاجەت. قاۋىپسىزدىك، الاياقتاردان قورعاۋ ءىىم، ۇقق سەكىلدى ورگانداردىڭ قۇزىرەتىندە»، - دەدى ۆەدومستۆو باسشىسى.
ايتا كەتەيىك، قازاقستاندىقتار جەكە باسىنا قاتىستى قاتە مالىمەتتەردى eGov ارقىلى ونلاين تۇزەتۋ مۇمكىندىگىنە يە بولادى.