7 جىلدان كەيىن تاعى بانكروتتىققا ءوتىنىش بەرە الادى.
ەلىمىزدە بانكروت بولعان ازاماتقا 5 جىلعا دەيىن نەسيە بەرىلمەيدى. سونداي-اق، جاعدايى قيىنداي تۇسسە، 7 جىلدان كەيىن تاعى بانكروتتىققا ءوتىنىش بەرە الادى. بۇل تۋرالى ق ر قارجى ۆيسە-مينيسترى ەرجان ءبىرجانوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بانكروت مارتەبەسىن الۋدىڭ سالدارىنا توقتالسام. جەكە تۇلعاعا 5 جىلعا دەيىن نەسيە بەرۋ شەكتەلەدى. ازامات اراعا 7 جىل سالىپ، بانكروتتىققا قايتا جۇگىنە الادى. بانكروتتىقتان كەيىن 3 جىل ىشىندە ول ازاماتتىڭ قارجىلىق جاعدايىنا مونيتورينگ جۇرگىزۋ كوزدەلگەن. سول سەبەپتى ازامات ءوزىن بانكروت دەپ جاريالاۋدان بۇرىن ىقتيمال سالدارى مەن شەكتەۋلەر تۋرالى ويلانۋى قاجەت»، - دەدى ەرجان ءبىرجانوۆ سەنات قابىرعاسىندا وتكەن دوڭگەلەك ۇستەل بارىسىندا.
ونىڭ ايتۋىنشا، سوت بانكروتتىق ءراسىمىن قارجى باسقارۋشىلارى ارقىلى جۇزەگە اسىرادى.
ياعني، زاڭدى تۇلعالار مەن جەكە كاسىپكەرلەردى بانكروتتىق ءراسىمىن جۇزەگە اسىراتىن اكىمشىلەر، كاسىبي بۋحگالتەرلەر، زاڭ كونسۋلتانتتارى جانە اۋديتورلار.
«نەگىزگى زاڭ جوباسىنان بولەك، 4 كودەكس پەن 12 زاڭ بويىنشا وزگەرتۋلەردى كوزدەيتىن ىلەسپە زاڭ جوباسى مەن «ق ر اكىمشىلىك قۇقىق بۇزۋشىلىق تۋرالى» كودەكسىنە وزگەرىستەر مەن تولىقتىرۋلار ەنگىزۋ ۇسىنىلادى. جالپى، اتالعان زاڭدى ىسكە اسىرۋ ازاماتتاردىڭ بورىشتىق جۇكتەمەسىن ازايتۋعا، الەۋمەتتىك شيەلەنىستى جەڭىلدەتىپ، قارجىلىق ساۋاتتىلىقتى ارتتىرۋعا باعىتتالادى. سونىمەن قاتار قارىزدى بانكروتتىقتان كەيىن ءبىرقاتار شەكتەۋ ازاماتتاردىڭ قارىزىن وتەۋگە ىنتالاندىرادى دەگەن ۇمىتتەنەمىز»، - دەيدى ول.