ەلىمىزدە 2025 جىلعى 13 ساۋىردەن باستاپ اتا-انالار مەن باسقا دا جاقىن تۋىستار اراسىندا بالامەن قارىم-قاتىناس جاساۋ تارتىبىنە بايلانىستى داۋلاردى شەشۋدىڭ ءبىرىڭعاي ەرەجەسى قولدانىسقا ەنگىزىلدى.
بۇعان دەيىن بۇل ماسەلەلەر قورعانشىلىق ورگاندارىمەن قارالعانىمەن، ءار وڭىردە ءارتۇرلى ءتاسىل قولدانىلعان بولاتىن. ەندى ق ر وقۋ-اعارتۋ مينيسترلىگىمەن بەكىتىلگەن ورتاق ءتارتىپ بارلىق وڭىردە بىردەي ىسكە اسادى، دەپ حابارلايدى aqshamnews.kz.
اتا-اناعا نەمەسە جاقىن تۋىستارىنا – اتاسىنا، اجەسىنە، اعاسىنا نەمەسە اپكەسىنە بالامەن قارىم-قاتىناس جاساۋعا شەكتەۋ قويىلعان جاعدايدا، بالانىڭ تۇرعىلىقتى جەرى بويىنشا قورعانشىلىق جانە قامقورشىلىق ورگانىنا ءوتىنىش بەرە الادى.
وتىنىشكە كەلەسى قۇجاتتار قوسا تىركەلەدى:
• جەكە كۋالىكتىڭ كوشىرمەسى؛
• ناركولوگيالىق جانە پسيحياتريالىق ديسپانسەرلەردەن انىقتامالار؛
• سوتتىلىعىنىڭ جوقتىعى تۋرالى انىقتاما؛
• مەكەنجايىن راستايتىن قۇجات.
«ءبىز العاش رەت وسىنداي كۇردەلى دە سەزىمتال ماسەلەلەردى شەشۋدىڭ ءبىرىڭعاي ءتارتىبىن ەنگىزىپ وتىرمىز. بۇل – بالانىڭ قۇقىعى مەن مۇددەسىن قورعاۋعا، ونىڭ جاقىندارىمەن بايلانىسىن ۇزبەۋگە باعىتتالعان ناقتى قادام»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قورعانشىلىق ورگانى ءوتىنىشتى 15 جۇمىس كۇنى ىشىندە قاراپ شىعادى. وسى مەرزىمدە ماماندار ەكى تاراپپەن جەكە سويلەسىپ، قاجەت بولسا تۇرمىستىق جاعدايدى زەردەلەيدى. ەگەر بالا 10 جاسقا تولعان بولسا، ونىڭ دا پىكىرى ەسكەرىلەدى.