قازاقستاندا بالالارعا ۇشاقپەن تەگىن ۇشۋعا مۇمكىندىك بەرەتىن باعدارلاماعا سۇرانىس بولماي وتىر

باعدارلاما تۋريستىك وپەراتورلار ارقىلى ىسكە اسادى.

قازاقستاندا وتباسىلىق تۋريزمگە ارنالعان جاڭا Kids Go Free باعدارلاماسى ءالى سۇرانىسقا يە ەمەس. سەبەبى، ەلىمىزدە تۋريستىك ماۋسىم ءالى باستالعان جوق. Kazakh Tourism كومپانياسى باسقارما ءتوراعاسىنىڭ ورىنباسارى قايرات ءسادۋاقاسوۆ العاشقى ناتيجەلەر جازدىڭ ورتاسىندا شىعارىلاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ازىرگە سۇرانىس كوپ ەمەس. ويتكەنى باعدارلاما جاڭا جانە بۇرىن جۇزەگە اسىرىلماعان. مەحانيزم تاراپىنان تۇسىنبەۋشىلىك بار. سونىمەن قاتار، تۋريستەر اراسىندا ءبىلىمنىڭ ازدىعى دا اسەر ەتىپ جاتىر. ءقازىر وسى ەكى باعىت بويىنشا جۇمىس ىستەپ جاتىرمىز. باعدارلاما تۋريستىك وپەراتورلار ارقىلى ىسكە اسادى. ولار وسى پاكەتتەردى ساتادى، سوسىن مەملەكەتتەن سۋبسيديا الادى. سونداي-اق باعدارلاماعا قاتىستى ۇسىنىستارىن ايتادى. ءبىز ونىمەن جۇمىس ىستەپ جاتىرمىز»، - دەيدى قايرات ءسادۋاقاسوۆ.

ونىڭ ايتۋىنشا، جوبانى حالىق اراسىندا ناسيحاتتاۋ ماقساتىندا ۇلكەن جارناما جاسالادى.

«دەمالىس ماۋسىمى باستالا قويماعاندىقتان، سۇرانىس كوپ ەمەس. العاشقى ناتيجەلەردى جازدىڭ ورتاسىنا قاراي قورىتىندىلاي الامىز. بۇل - ءبىرىنشى پيلوتتىق جىل. ناتيجەسى بويىنشا سۋبسيديانى كوبەيتۋ نەمەسە ازايتۋ ماسەلەسى قارالادى. ءبىراز وزگەرىستەر ەنگىزەمىز»، – دەپ اتاپ ءوتتى قايرات ءسادۋاقاسوۆ.

قازاقستان تۋروپەراتورلارى قاۋىمداستىعىنىڭ پرەزيدەنتى يننا رەي دە باعدارلامانى پىسىقتاۋ كەرەكتىگىن ايتتى.

ەسكە سالايىق، بيىلدان باستاپ ەكى جاستان ون ءتورت جاسقا دەيىنگى بالالار قازاقستاندا ۇشاقپەن تەگىن ۇشا الادى.