قازاقستاندا بالاباقشالارعا ۆاۋچەرلىك قارجىلاندىرۋ جۇيەسى ەنگىزىلەدى

قازىرگى كەزدە بۇل جوبا پيلوتتىق نەگىزدە ىسكە اسىپ جاتىر. 

بالاباقشالارعا ۆاۋچەرلىك قارجىلاندىرۋ جۇيەسى ەنگىزىلەدى. قازىرگى تاڭدا بۇل جوبا پيلوتتىق نەگىزدە ىسكە اسىپ جاتىر. بۇل تۋرالى وقۋ-اعارتۋ مينيسترلىگىنىڭ «قارجى ورتالىعى» اق باسقارما ءتوراعاسى اسقار يبرايموۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.   

«ۆاۋچەرلىك قارجىلاندىرۋدىڭ قاشان جاپپاي قولدانىسقا ەنگىزىلەتىنى بەلگىسىز. قازىرگى تاڭدا ءبىز ونى تەك پيلوتتىق نەگىزدە ىسكە قوستىق. وعان 15 بالاباقشا، ياعني 180 اتا-انا قاتىسىپ جاتىر. جوبانى پىسىقتاۋ ماقساتىندا وعان وزگەرىستەر مەن تولىقتىرۋلار ەنگىزىلەدى»، - دەدى اسقار يبرايموۆ. 

مەكتەپكە دەيىنگى ءبىلىم بەرۋ كوميتەتىنىڭ ءتوراعاسى گۇلميرا كارىموۆانىڭ ايتۋىنشا، ۆاۋچەرلىك قارجىلاندىرۋ جۇيەسى ەنگىزىلسە، وندا اتا-انالار بالاباقشانى تاڭداۋعا، ونىڭ بيۋدجەتىن قاداعالاۋعا مۇمكىندىك الادى. 

«بۇرىن مەملەكەتتىك تاپسىرىس شەڭبەرىندە بالاباقشالارعا قارجىنى جەرگىلىكتى اتقارۋشى ورگاندار تاراتاتىن ەدى. ال ەندى ۆاۋچەرلىك قارجىلاندىرۋ ارقىلى بۇل ىسكە اتا-انالار دا ارالاسا الادى. سونىمەن قاتار اتا-انالار بالاباقشانى تاڭداۋعا، بيۋدجەتتى قاداعالاۋعا مۇمكىندىك الادى. وسىلايشا، بۇرىن وسى جۇمىستاردى اتقارىپ كەلگەن جەرگىلىكتى اتقارۋشى ورگانداردان اتالعان مىندەتتەر الىنىپ تاستالادى. پيلوتتىق جوبا ءساتتى ىسكە اسسا، وندا ءبىرىنشى كەزەكتە ۆاۋچەرلىك قارجىلاندىرۋ جۇيەسىن نۇر-سۇلتان قالاسىندا ەنگىزۋ جوسپارلانعان»، - دەدى گۇلميرا كارىموۆا.