قازاقستاندا بالاباقشاعا كەزەككە تۇرۋدىڭ ءبىرىڭعاي بازاسى قۇرىلادى

اتا-انالار Egov.kz پورتالى نەمەسە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى بالانى كەزەككە قويۋ ءۇشىن بىردەن 4 بالاباقشاعا دەيىن تاڭداپ، كەيىن ونلاين بەرىلگەن ءوتىنىشتىڭ مارتەبەسىن باقىلاي الادى. بالاباقشالاردىڭ بىرىندە ورىن بولا قالعان جاعدايدا دەرەۋ اتا-اناعا حابارلانادى، دەپ حابارلايدى اlmaty-akshamy.kz

جالپى بالاباقشا تاڭداۋدان باستاپ، كەلىسىمشارت جاساسۋعا دەيىنگى بارلىق ءراسىم ەلەكتروندى فورماتتا وتەدى.

ءبىرىڭعاي دەرەكتەر بازاسى مەكتەپكە دەيىنگى ۇيىمداردا ورىنداردى ءبولۋدىڭ تولىق اشىقتىعىن قامتاماسىز ەتۋ ءۇشىن جاسالماق. ۇكىمەت بۇل جۇيە بالاباقشالارداعى قوسارلانعان كەزەكتى جانە سىبايلاس جەمقورلىق تاۋەكەلدەرىن جويادى دەپ ۇمىتتەنىپ وتىر.

ءبۇلدىرشىننىڭ دەنساۋلىعى تۋرالى قاجەتتى قۇجاتتار دەنساۋلىق ساقتاۋ مينيسترلىگىنىڭ دەرەكتەر بازاسىنان اۆتوماتتى تۇردە الىنادى. كەلىسىمشارت قول قويۋعا جانە بالانى بالاباقشاعا تىركەۋ ءۇشىن اتا-انالارعا ونلاين رەجيمدە جولدانادى.
قازاق تىلىنەن ەمتيحان

2024 جىلى 5-8 جانە 10-سىنىپ وقۋشىلارى قازاق تىلىنەن ەمتيحان تاپسىرادى. بۇل وزگەرىستەر 2023-2024 وقۋ جىلىنان باستاپ ەنگىزىلگەن، ياعني مامىر ايىندا بالالاردىڭ قازاق تىلىنەن ءبىلىمى تەكسەرىلەدى.

ەمتيحان جازباشا جانە اۋىزشا وتەدى. تىڭداۋ، سويلەۋ، وقۋ جانە جازۋ سياقتى داعدىلار باعالانادى. ەمتيحان تاپسىرمالارىن مۇعالىمدەر اكادەميالىق ادالدىق قاعيداتتارىن ساقتاي وتىرىپ وزدەرى قۇراستىرادى.

قازاق ءتىلى پانىنەن قورىتىندى باعا ەمتيحان جانە جىلدىق باعالاۋ ناتيجەسى بويىنشا قويىلادى.
بۇعان دەيىن قازاق تىلىنەن ەمتيحاندى 9 جانە 11-سىنىپ وقۋشىلارى عانا تاپسىراتىن.