قازاقستاندا باعا تۋرالى ءبىرىڭعاي دەرەكقور ىسكە قوسىلدى

وسى ارقىلى ازىق-تۇلىك تاۋارلارىنىڭ باعاسىنا ناقتى ۋاقىت رەجيمىندە مونيتورينگ جۇرگىزۋگە  بولادى.

قازاقستان ۇكىمەتى الەۋمەتتىك ماڭىزى بار ازىق-تۇلىك تاۋارلارىنىڭ باعاسى  تۋرالى ءبىرىڭعاي دەرەكقوردى ىسكە قوستى، دەپ حابارلايدى Almaty-akshamy.kz.

Cاۋدا جانە ينتەگراسيا مينيسترلىگى باسپا ءسوز قىزمەتىنىڭ دەرەگى بويىنشا، اتالمىش ۆەدومستۆو اعىمداعى جىلدىڭ ماۋسىم ايىندا پيلوتتىق رەجيمدە Eprice.gov.kz پلاتفورمانى ىسكە قوستى.

مامانداردىڭ ايتۋىنشا، پلاتفورمانىڭ نەگىزگى مىندەتى - الەۋمەتتىك ماڭىزى بار ازىق-تۇلىك تاۋارلارىنىڭ باعالارى تۋرالى ءبىرىڭعاي دەرەكقوردى جانە دەرەكتەردى ۆيزۋاليزاسيالاۋ ءۇشىن ينتەراكتيۆتى ورتانى قالىپتاستىرۋ. 

بۇل الەۋمەتتىك ماڭىزى بار ازىق-تۇلىك تاۋارلارىنىڭ باعاسىنا ناقتى ۋاقىت رەجيمىندە مونيتورينگ جۇرگىزۋگە جانە وڭىرلەر بولىنىسىندە ولاردىڭ وزگەرۋىن تالداۋعا مۇمكىندىك بەرەدى.

«وسى دەرەكتەر كوزدەرىنىڭ ءبىرى Derekhub.kz. بۇل - مونيتورينگتىك توپتار ءۇشىن ىڭعايلى قۇرال بولىپ تابىلاتىن جانە وڭىرلەر بولىنىسىندە تاماق ونىمدەرى مەن دارىلىك زاتتاردىڭ 19 اتاۋى بويىنشا دەرەكتەر ەنگىزىلەتىن اقپاراتتىق جۇيە»، – دەلىنگەن مينيسترلىك حابارلاماسىندا.

جۇيەنى قالىپتاستىرۋ ءارتۇرلى دەرەكتەر كوزدەرىن ينتەگراسيالاۋ ارقىلى جۇزەگە اسىرىلادى دەپ بولجانۋدا. 

قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار جونىندەگى اگەنتتىگى ۇلتتىق ستاتيستيكا بيۋروسىنىڭ، قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتىنىڭ، قازاقستان رەسپۋبليكاسى اۋىل شارۋاشىلىعى مينيسترلىگىنىڭ جانە ت. ب. اقپاراتتىق جۇيەلەرىنەن دەرەكتەردى جيناۋ جانە تالداۋ جوسپارلانۋدا.