قازاقستاندا اۆتوگاز 4-6 تەڭگە قىمباتتايدى، - دەپ حابارلايدى Almaty-akshamy.kz Kolesa.kz سايتىنا سىلتەمە جاساپ.
سايت مالىمەتىنشە، وعان گازدىڭ كوتەرمە باعاسى مەن تاسىمال قۇنى وسكەنى سەبەپ بولدى.
- استانا قالاسى، اقمولا، قوستاناي، قاراعاندى، اباي، جەتىسۋ، ۇلىتاۋ جانە شىعىس قازاقستان وبلىستارىندا - 70–76 تەڭگە؛
- الماتى قالاسى، الماتى وبلىسى، سولتۇستىك قازاقستان وبلىسىندا - 75–81 تەڭگە؛
- اقتوبە، اتىراۋ، ماڭعىستاۋ وبلىسىندا - 50–54 تەڭگەگە دەيىن؛
- شىمكەنت، بقو، قىزىلوردا، تۇركىستان وبلىسىندا - 60–64 تەڭگە؛
- جامبىل وبلىسىندا - 65–71 تەڭگە؛
- پاۆلودار وبلىسى - 70–74 تەڭگە.
باسەكەلەستىكتى قورعاۋ جانە دامىتۋ اگەنتتىگى بۇيرىق جوباسىندا 2023 جىلعى 1 شىلدەدەن باستاپ ەلىمىزدە سۇيىتىلعان مۇناي گازىنىڭ كوتەرمە باعاسى 20 پايىز (33 600 تەڭگەدەن 40 320 تەڭگەگە) وسەتىنىن اتاپ وتكەن. سوعان ساي بولشەك ساۋدا باعاسىن 4 تەڭگە كوتەرۋ قاجەت.
27 ساۋىردەن باستاپ تەمىرجول ءتاريفى 28 پايىز قىمباتتادى. سول ءۇشىن اگەنتتىك زاۋىتتان شالعاي وڭىرلەردە جوعارىداعى 4 تەڭگەگە تاعى 2 تەڭگە قوسىپ، بەكەتتەردەگى گاز باعاسىن بىردەن 6 تەڭگە كوتەرۋدى ۇسىنىپ وتىر.
قۇجات جوباسىندا بولشەك ساۋدا باعاسى ناقتى قاشان وسەتىنى جازىلماپتى، ءبىراق العاش جاريالانعان كۇنىنەن باستاپ كۇشىنە ەنەدى ەكەن. كوتەرمە باعا 1 شىلدەدەن باستاپ وزگەرەتىنىن ەسكەرسەك، بەكەتتەردەگى بولشەك باعا دا سول كۇنى وسەتىن شىعار.
بيىل ساۋىردە ەنەرگەتيكا مينيسترلىگى گاز قۇنى بەنزين باعاسىنىڭ 70 پايىزىنا جەتۋى كەرەك ەكەنىن ايتقان. وسىدان كەيىن الماتى قالاسى، شقو، سقو، الماتى جانە اباي وبلىستارىندا باعا وزگەردى. ەندى بەكەتتەردە كوگىلدىر وتىن تاعى قىمباتتايدى.