ەندى سۋبسيديالاۋ پروسەسى 1 ايعا دەيىن قىسقارادى.
ەلىمىزدە اۋىل شارۋاشىلىعىنا مەملەكەتتەن سۋبسيديا الۋ پروسەسى جەڭىلدەي تۇسپەك. بۇل تۋرالى ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت باسشىسىنىڭ تاپسىرماسىنا سايكەس، اۋىل شارۋاشىلىعى سالاسىن سۋبسيديالاۋ ماسەلەلەرىن قۇرامىندا 160-تان استام مامان بار جۇمىس توبى قاراپ جاتىر. وسىعان دەيىن 9 وتىرىس ءوتتى. سالا ماماندارىنىڭ ءوتىنىش-ۇسىنىستارى نازارعا الىنىپ، سۋبسيديالاۋ سالاسىنا وزگەرىستەر ەنگىزىلدى. ايتار بولساق، اتالعان سالادا سىبايلاس جەمقورلىق ارەكەتتەرىنىڭ الدىن الۋ ماقساتىندا سۋبسيديا تولىقتاي ەلەكتروندى فورماتقا كوشەدى. ياعني سۋبسيدياعا ءوتىنىش بەرۋ، قابىلداۋ جانە سومانى راستاۋ ادامنىڭ قاتىسۋىنسىز وتەدى»، - دەدى ەربول قاراشوكەيەۆ ماجىلىستە وتكەن دوڭگەلەك ۇستەل بارىسىندا.
ءمينيستردىڭ سوزىنە سەنسەك، بۇعان دەيىن اۋىل شارۋاشىلىعى سالاسىن سۋبسيديالاۋ پروسەسى 3-4 اي ۋاقىت السا، ەندى 1 ايعا دەيىن قىسقارادى.
«باقىلاۋ ورگاندارى تاراپىنان ايتىلعان ەسكەرتۋلەرگە قۇلاق اسىپ، ءتيىمسىز، وزەكتى ەمەس جانە باقىلاۋى قيىن سۋبسيديا تۇرلەرى قىسقارتىلدى. قارجى بولۋگە كەلسەك، اۋىل شارۋاشىلىعى سالالارى بويىنشا سول بۇرىنعى سومالار ساقتالىپ قالادى. باعىتىنا قاراي 15 پايىزدان 80 پايىزعا دەيىن ينۆەستيسيالىق سۋبسيديا قاراستىرىلعان»، - دەيدى ول.
ايتا كەتسەك، ماجىلىستە «اگروونەركاسىپتىك كەشەندى سۋبسيديالاۋعا ارنالعان جاڭا تاسىلدەر» تاقىرىبىندا دوڭگەلەك ۇستەل ءوتىپ جاتىر.
جيىنعا قاتىسۋشىلار اۋىل شارۋاشىلىعى سالاسىن سۋبسيديالاۋداعى پروبلەمالار، يمپورتتى الماستىرۋ پەرسپەكتيۆالارى، ءونىم باعاسىن قالىپتاستىرۋ جانە باسقا ماسەلەلەردى تالقىلاپ جاتىر.