قازىرگى ۋاقىتتا اقاۋ شىققان جەر انىقتالدى
پەتروپاۆلدا تاعى سۋ قۇبىرى جارىلىپ، جۇرتتى ابىگەرگە سالدى. قىسىمنىڭ ازدىعىنان جۇمىسشى كەنتى مەن "بەرەكە" شاعىناۋدانى تىرشىلىك ءنارىنسىز قالدى. اپاتتىڭ قاتتى بولعان سونشالىق، قالاعا كىرەبەرىستەگى جول مەن ۇيلەردى سۋ باسقان، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءتۇن جارىمدا 314-اتقىشتار ديۆيزياسى كوشەسىندە قۇبىر جارىلىپ، قالادا سۋ قىسىمى تومەندەگەن. ديامەترى 800 ءمم-دى قۇرايتىن جابدىقتان جان-جاققا جايىلعان سۋ جاقىن ماڭايداعى تۇرعىن ۇيلەرگە دەيىن جەتىپتى. اپاتتان زارداپ شەككەن اندرەي چەرنوۆ جەرتولەدە ساقتالعان ازىق-تۇلىكتىڭ ءبارى سۋعا كەتىپ، جارامسىز بولىپ قالعانىن ايتادى.
«تۇنگى ساعات 3:40 كەزىندە كورشىم حابالاسىپ، سۋ باسىپ جاتقانىن ايتتى. سۋ تىزەمنەن ءسال تومەندەۋ جەردەن كەلدى. جەرتولەدەگى زاتتىڭ ءبارى كەرەكسىز بولىپ قالدى. ارى قاراي نە بولاتىنىن بىلمەيمىن»، – دەدى قالا تۇرعىنى اندرەي چەرنوۆ.
سۋ قۇبىرىنداعى اپاتتان قىسىم تومەندەپ، قالا بىرنەشە ساعاتقا سۋدان اجىراتىلدى. جوندەۋ بريگاداسى كەي جەردەگى جاعدايدى رەتتەپ، جۇمىسشى كەنتى مەن "بەرەكە" شاعىناۋدانىنان باسقاسىن سۋعا قوستى. ەلدى مەكەن تۇرعىندارى جازدا ساپاسىز جاسالعان جوندەۋ جۇمىستارىنىڭ كەسىرىنەن اپات ءجيى بولاتىنىن ايتىپ شاعىمداندى.
«جاعداي ءبىزدى قاتتى الاڭداتادى. نە تاماق پىسىرە المايسىڭ، نە جۋىنا المايسىڭ. ۇيدە ەكى قارت كىسى بار. سۋ الۋ ءۇشىن دۇكەنگە بارىپ ءجۇرمىز. اپاتتىڭ جيىلەپ كەتكەنى ىڭعايسىزدىق تۋعىزادى»، – دەدى قالا تۇرعىنى ۆەرا دميترييەۆا.
قىسىمنىڭ تومەندىگىنە بايلانىستى "بەرەكە" شاعىناۋدانى مەن جۇمىسشى كەنتىندەگى ءبىلىم بەرۋ ورىندارى دا سۋسىز قالدى. № 31 مەكتەپ ديرەكتورىنىڭ ايتۋىنشا، سۋ ارنايى كولىك ارقىلى مەكتەپكە جەتكىزىلىپ، وقۋشىلار قالىپتى رەجيمدە وقىپ جاتىر. ال «قىزىلجار سۋ» جاۋاپكەرشىلىگى شەكتەۋىل سەرىكتەستىگى اتقارۋشى ديرەكتورىنىڭ ايتۋىنشا، قالىپقا كەلتىرۋ جۇمىسى كۇن رايىنىڭ سالقىن بولۋىنا بايلانىستى قيىنداپ كەتكەن. ءبىراق شامامەن 1 تاۋلىك ىشىندە قىسىمى تومەن اۋداندارعا سۋ قوسۋىمىز مۇمكىن دەپ سەندىردى.
«ءبىز تۇرعىنداردى سۋمەن قامتاماسىز ەتۋ ءۇشىن قىسىمدى ارتتىرۋعا تىرىسامىز. ءقازىر اپات شىققان ورىندى جوندەۋگە كىرىستىك. قۋات قورى جەتكىلىكتى. كەرەك-جاراقتىڭ ءبارى الدىن الا ساتىپ الىندى»، – دەدى «قىزىلجار سۋ» ج ش س اتقارۋشى ديرەكتورى ارمان ساۋىتوۆ
اپات بولعان جەردە قۇبىرلاردى جوندەۋ جۇمىستارى 2009 جىلى جۇرگىزىلگەن. سول كەزدە جۇمىس جاساعان مەردىگەردىڭ جوقتىعىنا بايلانىستى قالىپقا كەلتىرۋ شىعىنى «قىزىلجار سۋ» كومپانياسىنا جۇكتەلىپ وتىر. ايتا كەتەيىك، ءبىر جارىم ايدىڭ ىشىندە پەتروپاۆلدا 3 اپات بولدى.