قازاقستاندا اۋە كومپانيالارىنىڭ ءوز رەيستەرىنىڭ جاعدايىن وزگەرتۋى نەمەسە ولاردى ورىنداماۋى سالدارىنان جولاۋشىلارعا كەلتىرىلگەن ىڭعايسىزدىقتار ءۇشىن جاۋاپكەرشىلىگى كۇشەيتىلەدى. «اشىق نقا» پورتالىندا جاريالانعان زاڭ جوباسىندا اۋە كومپانيالارىنىڭ جولاۋشىلارعا كورسەتىلەتىن قىزمەتتەردى ءتيىستى دەڭگەيدە ورىنداماۋى، رەيستىڭ كەشىگۋى، جويۋى نەمەسە مارشرۋتىنىڭ وزگەرۋى سياقتى جاعدايلار ءۇشىن ايتارلىقتاي ايىپپۇلدار قاراستىرىلعان، دەپ حابارلايدى aqshamnews.kz
قازاقستان رەسپۋبليكاسىنىڭ اۋە كەڭىستىگىن پايدالانۋ تۋرالى زاڭى جانە ق ر اكىمشىلىك قۇقىق بۇزۋشىلىق تۋرالى كودەكسىنىڭ 567-بابى بويىنشا اۋە كومپانيالارى رەيستەردىڭ كەشىگۋى نەمەسە جويۋى ءۇشىن جولاۋشىلارعا وتەماقى تولەۋگە مىندەتتى. ءبىراق بۇل تالاپتار رەيس مارشرۋتىنىڭ نەمەسە ۇشۋ ۋاقىتتارىنىڭ وزگەرۋىنە قاتىستى جاعدايلاردا قولدانىلا بەرمەيدى. قۇقىقتىق ولقىلىقتار سالدارىنان، اۋە كومپانيالارى كوبىنە بۇل وزگەرىستەر ءۇشىن جاۋاپكەرشىلىكتەن جالتارادى. ال مۇنداي جاعدايلار ءجيى كەزدەسىپ، 2023 جىلى رەيستەردىڭ 16 مىڭنان استام كەشىگۋى تىركەلگەن جانە جولاۋشىلاردىڭ شاعىمدارى وتكەن جىلمەن سالىستىرعاندا ەكى ەسە كوبەيگەن.
قۇجاتتىڭ جاڭا رەداكسياسىندا اۋە كومپانيالارىنىڭ جاۋاپكەرشىلىگىن ارتتىرۋ ماقساتىندا، رەيس وزگەرىستەرى نەمەسە باسقا دا كەمشىلىكتەر ءۇشىن ايىپپۇل مولشەرى ايتارلىقتاي وسەدى. جاڭا تۇزەتۋلەرگە سايكەس:
- ءبىرىنشى رەت بۇزۋشىلىق ءۇشىن ايىپپۇل مولشەرى 400 ايلىق ەسەپتىك كورسەتكىشكە (اەك) دەيىن،
- ءبىر جىل ىشىندە قايتالانعان جاعدايدا 2000 اەك-كە دەيىن ايىپپۇل سالىنۋى مۇمكىن.
بۇل شارالار اۋە كومپانيالارىن ءوز مىندەتتەمەلەرىن ورىنداۋعا، ياعني جولاۋشىلارعا جاقسى قىزمەت كورسەتۋگە ىنتالاندىرۋدى ماقسات ەتەدى.
الەمنىڭ كوپتەگەن ەلدەرىندە جولاۋشىلاردىڭ ىڭعايسىزدىقتارى ءۇشىن وتەماقى تولەۋ مىندەتى زاڭدى تۇردە قاراستىرىلعان. مىسالى، اقش-تا جولاۋشىلاردىڭ قۇقىقتارىن بۇزعانى ءۇشىن ايىپپۇلدار 50 مىڭ اقش دوللارىنا دەيىن جەتۋى مۇمكىن، ال ساۋد ارابياسىندا بۇل سوما 50 مىڭ ريالعا دەيىن جەتەدى.
جاڭا زاڭ جوباسىندا اۋە كومپانيالارىنىڭ نورمالاردى ساقتاۋىن باقىلاۋ جولاۋشىلاردىڭ شاعىمدارى مەن ينسپەكسيالىق تەكسەرۋلەر ارقىلى جۇزەگە اسىرىلادى. ەگەر اۋە كومپانياسى ءوز مىندەتتەمەلەرىن ورىنداۋدان باس تارتسا، ماسەلە سوتقا دەيىن جەتكىزىلۋى مۇمكىن. بۇل زاڭ جوباسى قوسىمشا تەكسەرۋلەر جۇرگىزۋدى قاراستىرماسا دا، ايىپپۇلداردى كوبەيتۋ ارقىلى اۆياكومپانيالاردىڭ جاۋاپكەرشىلىگىن ارتتىرۋدى كوزدەيدى.