قازاقستاندا اۋا رايىنا بايلانىستى پويىزدار كەشىگىپ جاتىر

ۆوكزالداردا پويىزداردىڭ كەشىگەتىنى حابارلانىپ وتىر. 

ەلىمىزدە اۋا رايىنىڭ قولايسىزدىعىنان كەيبىر پويىزدار ۋاقىتىنان كەشىگىپ جاتىر، دەپ حابارلايدى Almaty-akshamy.kz

«اۋا رايىنىڭ قولايسىزدىعىنا بايلانىستى قاۋىپسىزدىكتى قامتاماسىز ەتۋ ءۇشىن تەمىرجول ۋچاسكەلەرىندە قوزعالىس جىلدامدىعىنا شەكتەۋ قويىلدى»، - دەلىنگەن «قازاقستان تەمىر جولى» ۇلتتىق كومپانياسىنىڭ باسپا ءسوز قىزمەتىنىڭ حابارلاماسىندا.

ءدال ءقازىر كەشىگىپ جاتقان پويىزدار:

- № 3/4 جانە № 9/10 «استانا-الماتى»،

- № 45/46 «پاۆلودار-تۇركىستان»،

- № 51/52 «الماتى-ورال»،

- № 65/66 «استانا-جەزقازعان»،

- № 71/72 جانە № 86/85 «استانا-شىمكەنت»،

- № 73/74 «الماتى-جەزقازعان»،

-№ 105/106 «الماتى-پەتروپاۆل».

سونداي-اق، ۇلتتىق كومپانيادان پويىزداردىڭ قوزعالىس كەستەسىن قالپىنا كەلتىرۋ بويىنشا قاجەتتى شارالاردىڭ قابىلدانىپ جاتقانى ايتىلدى.

«ۆوكزالداردا پويىزداردىڭ كەشىگەتىنى حابارلانىپ وتىر. حابارلاما 1433 انىقتاما قىزمەتى ارقىلى تاۋلىك بويى بەرىلەدى. ەگەر پويىز 3 ساعاتتان ارتىق كەشىكسە جولاۋشىلارعا SMS حابارلاما جىبەرىلەدى»، - دەلىنگەن حابارلامادا.

ودان بولەك، رەسمي اقپاراتتا ايتىلعانداي، پويىز بيلەتتەرىن كەرى قايتارۋ جايلى مالىمەتتى +7 (707) 270-36-64 (WhatsApp) نومىرىنەن بىلۋگە بولادى.

«كەشىككەن پويىزدىڭ ءار ساعاتى ءۇشىن بيلەت قۇنىنىڭ ءۇش پايىزى مولشەرىندە ايىپپۇل تولەنەدى. پويىز 6 ساعاتتان ارتىق كەشىكسە، مەيرامحانادا تەگىن تاماق بەرىلەدى. سول سياقتى ۆوكزالدارداعى تاماقتانۋ ورىندارى مەن ساۋدا نۇكتەلەرىنىڭ، سانيتارلىق ايماقتاردىڭ (اجەتحانالاردىڭ) ۇزدىكسىز جۇمىس ىستەۋى باقىلاۋدا»، - دەپ حابارلايدى قازاقستان تەمىر جولى.