بۇل اسكەري قىزمەتكە دەگەن قىزىعۋشىلىقتى ارتتىرۋى ىقتيمال.
اسكەري بورىشىن وتەگەن جانە «كادەت» سىنىبىن بىتىرگەن تۇلەكتەر ۋنيۆەرسيتەتكە گرانت الۋ ءۇشىن 5% كۆوتا بولىنەدى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى Almaty-akshamy.kz.
«كەشە قورعانىس مينيسترىمەن بىرگە مەكتەپتەردە اسكەري-پاتريوتتىق تاربيە بەرۋ، ەلىمىزدىڭ اسكەري جوعارى وقۋ ورىندارىندا كادرلاردى دايارلاۋ جانە اسكەري قىزمەتتىڭ تارتىمدىلىعىن ارتتىرۋ ماسەلەلەرىن تالقىلادىق. مەملەكەت باسشىسى اسكەري-پاتريوتتىق تاربيە بەرۋ جۇمىسىن ارتتىرۋدى تاپسىرعان بولاتىن. وسى ورايدا بۇل ءىس-شارالار پرەزيدەنتتىڭ تاپسىرماسىن جۇزەگە اسىرۋعا باعىتتالىپ وتىر. ەلىمىزدىڭ اسكەري قاۋىپسىزدىگىن قامتاماسىز ەتۋ، وتانسۇيگىشتىككە تاربيەلەۋ، جاستاردى العاشقى اسكەري دايارلىقتان وتكىزۋ جانە وفيسەرلەر دايارلاۋ – ورتاق مىندەت. ال وسى باعىتتا ءبىزدىڭ مينيسترلىك وتە ماڭىزدى ءرول اتقارادى. وسىعان بايلانىستى ءبىرقاتار ۇسىنىستاردى قولعا الدىق»، - دەپ جازدى ءبىلىم ءمينيسترى ءوزىنىڭ Facebook-تەگى پاراقشاسىندا.
ءمينيستردىڭ ايتۋىنشا، مەرزىمدى اسكەري قىزمەتتى وتكەرۋدىڭ تارتىمدىلىعىن ارتتىرۋ ءۇشىن اسكەري بورىشىن وتەگەن جانە «كادەت» سىنىبىن بىتىرگەن تۇلەكتەرگە گرانت الۋ ءۇشىن 5% كۆوتا ءبولۋ ۇسىنىلدى. بۇل جىل سايىن 3 000-نان استام گرانت.
«ونىڭ ۇستىنە ۋنيۆەرسيتەت تۇلەكتەرى اسكەري قىزمەتتەن وتكەن جاعدايدا گرانتتى 3 جىل بويى وتەۋ مەرزىمىنەن بوساتىلادى. ءقازىر مەملەكەت ەسەبىنەن وقىعانداردىڭ بارلىعىنا ونى وتەۋ تالابى قويىلاتىنىن ەسكە سالا كەتەيىن. بۇل وقۋعا تۇسۋشىلەردى ىنتالاندىرىپ، اسكەري قىزمەتكە دەگەن قىزىعۋشىلىقتى ارتتىرادى دەپ ويلايمىن. ۇشىنشىدەن، ءبىز اسكەري قىزمەتتە نەمەسە بىتىمگەرشىلىك جانە باسقا دا ارنايى وپەراسيالارعا قاتىسىپ، قازا تاپقان اسكەري قىزمەتشىلەردىڭ بالالارىنا ۋنيۆەرسيتەتتەردە وقۋعا گرانتتار بەرۋ تۋرالى نورمانى ەنگىزۋدى ۇسىنىپ وتىرمىز»، - دەدى اسحات ايماعامبەتوۆ.