كونتەنتتى قالىپتاستىرۋ مەن وعان سۇرانىستى ارتتىرۋ ماڭىزدى.
قازاقستاننىڭ اقپاراتتىق دوكتريناسى بەكىتىلۋى مۇمكىن. ۇكىمەت «اشىق» نقا پورتالىندا پرەزيدەنت جارلىعىنىڭ جوباسىن جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اقپاراتتىق دوكترينا وتاندىق اقپاراتتىق سالانى دامىتۋ جونىندەگى كوزقاراستار مەن قاعيداتتار جۇيەسىن، ونىڭ اشىقتىعى مەن باسەكەگە قابىلەتتىلىگىن ارتتىرۋ تەتىكتەرىن ايقىنداماق. سونىمەن قاتار، قوعامنىڭ مۇددەلەرىنە جاۋاپ بەرەتىن جانە مەملەكەتتىڭ ودان ءارى دامۋىنا ىقپال ەتەتىن يدەيالىق قۇندىلىقتىقتاردى بەكىتەدى.
قۇجاتتا كورسەتىلگەندەي، دوكترينا اقپاراتتىق-كوممۋنيكاسيالىق سالادا مەملەكەتتىك ساياساتتى قالىپتاستىرۋدا جانە قوعامدىق قاتىناستاردى دامىتۋدا نەگىزگى قۇجات بولادى.
«دوكترينانىڭ ماقساتى - وتاندىق اقپاراتتىق سالانى دامىتۋ ءۇشىن جاعداي جاساۋ جانە ق ر اقپاراتتىق ەگەمەندىگىن قامتاماسىز ەتۋ شارالارىن ازىرلەۋ. سونىمەن قاتار، ول مەديالىق پروسەستىڭ بارلىق سۋبەكتىسىنە تەڭ جاعداي جاساۋعا جانە ولاردىڭ قۇقىقتارىن ىسكە اسىرۋعا، ءسوز بوستاندىعىن قامتاماسىز ەتۋگە، كونستيتۋسيالىق قۇقىقتاردىڭ ساقتالۋىن ەسكەرە وتىرىپ، زاڭمەن تىيىم سالىنباعان كەز كەلگەن تاسىلمەن اقپارات الۋعا جانە ونى تاراتۋعا، سونداي-اق اقپاراتتىق پروسەسكە قاتىسۋشىنىڭ اراسىندا سەنىم دەڭگەيىن ارتتىرۋعا باعىتتالعان. دوكترينانىڭ نەگىزگى باعىتى اقپاراتتىق قاۋىپسىزدىكتى قامتاماسىز ەتۋ مەن سىرتقى سىن-قاتەرلەرگە، تاۋەكەلدەرگە ۋاقتىلى دەن قويۋدى كوزدەيدى»، - دەپ جازىلعان ۇكىمەت قاۋلىسىندا.
قۇجاتقا سايكەس، وتاندىق باق-تا ساپالى كونتەنتتى قالىپتاستىرۋ مەن وعان سۇرانىستى ارتتىرۋ ماڭىزدى. سونداي-اق، شەتەلدىك اقپاراتتىق ونىمدەرگە تاۋەلدىلىكتى ازايتۋعا دەن قويۋ قاجەت. ول ءۇشىن مىناداي شارالار ۇسىنىلادى:
- جالعان اقپاراتقا قارسى ءىس-قيمىل جونىندەگى تەتىكتى كۇشەيتۋ جانە سىرتقى اقپاراتتىق قاتەرلەردى نيۆەليرلەۋ؛
- حالىقتىڭ سىني ويلاۋىن قالىپتاستىرا وتىرىپ، تالدامالى مازمۇنى بار كونتەنتتى دامىتۋ قاجەت؛
- مەملەكەتتىك ورگانداردىڭ كوممۋنيكاتيۆتىك ساياساتىنىڭ مودەلىن جەتىلدىرۋ. بارلىق مەملەكەتتىك مەنەدجەردى، باسپا ءسوز قىزمەتكەرلەرىنىڭ جانە قوعاممەن بايلانىس ءبولىمى ماماندارىنىڭ بىلىكتىلىگىن ۇزدىكسىز ارتتىرۋ؛
- مەملەكەت يەلىگىندەگى اقپاراتقا قولجەتىمدىلىكتى قامتاماسىز ەتۋ؛
- وتاندىق اقپاراتتىق ءونىم وندىرۋشىلەردىڭ سىرتقى نارىققا شىعۋىن ىنتالاندىرۋ.
اقپارات جانە قوعامدىق دامۋ مينيسترلىگىنىڭ دەرەگىنە ساي، دوكترينانى ىسكە اسىرۋ جالعان اقپاراتقا قارسى ءىس-قيمىلدىڭ مەملەكەتتىك تەتىگىن جەتىلدىرۋگە، ستراتەگيالىق كوممۋنيكاسيالاردىڭ ءتيىمدى جۇيەسىن قۇرۋعا جانە قازاق مادەنيەتىنىڭ جان-جاقتى دامۋى مەن قازاقستانداعى ازاماتتىق بىرەگەيلىكتى نىعايتۋدى قامتاماسىز ەتۋگە مۇمكىندىك بەرەدى.
قۇجاتتى اشىق تالقىلاۋ 29 جەلتوقسانعا دەيىن جالعاسادى. كەيىن تۇپكىلىكتى بەكىتۋ ءۇشىن مەملەكەت باسشىسىنا قول قويۋعا جولدانادى.