قازاقستاندا العاش رەت تەمىر جولدى جوندەۋدە وتاندىق رەلستەر پايدالانىلدى

لۋگوۆوي رەلس دانەكەرلەۋ كاسىپورنىندا» ۇزىن رەلستەر 800 مەترلىك جەلىلەرگە دانەكەرلەنەدى

العاش رەت اقتوبە رەلس بەلاعاش زاۋىتىنان (اربز) «لۋگوۆوي رەلس دانەكەرلەۋ كاسىپورنىنا» وتاندىق وندىرىستەگى 120 مەترلىك رەلس پارتياسى جەتكىزىلدى، دەپ حابارلايدى Almaty-akshamy.kz  «قازاقستان تەمىر جولى» ۇلتتىق كومپانياسىنا سىلتەمە جاساپ.

ەرەكشە ۇزىندىقتاعى بولات رەلستەردى تاسىمالداۋ ءۇشىن كومپانيا قازاقستاندا جاسالعان ۇزىن جىلجىمالى قۇرامدى دا ارنايى ساتىپ الدى.

اقتوبە رەلس بەلاعاش زاۋىتى بۇعان دەيىن دە تەمىر جول رەلستەرىن جوندەۋگە 100 مەترلىك رەلستەردى جەتكىزگەن. ول كەزدە رەسەيدە جالعا الىنعان 100 مەترلىك رەلس تاسىمالداۋشى ۆاگوندارمەن دىتتەگەن جەرىنە جەتكىزىلىپ وتىرعان.

«لۋگوۆوي رەلس دانەكەرلەۋ كاسىپورنىندا» ۇزىن رەلستەر 800 مەترلىك جەلىلەرگە دانەكەرلەنەدى. ولار جولدى كۇردەلى جوندەۋ كەزىندە پايدالانىلادى. بۇل جول كونسترۋكسياسىندا تۇيىسپەلەر از. سوندىقتان ولار جولاۋشىلار پويىزىنىڭ كەدەرگىسىز قوزعالىسىن جانە ۋچاسكەلەردەگى جۇك پويىزدارىنىڭ جىلدامدىعىن ارتتىرۋدى قامتاماسىز ەتەدى»، - دەلىنگەن حابارلامادا.

كومپانيا حابارلاعانداي، قتج مەن اربز اراسىنداعى ۇزاق مەرزىمدى كەلىسىم بويىنشا جىل سايىن ماگيسترالدىق تەمىرجول جەلىسىن جاڭعىرتۋ ءۇشىن 80 مىڭ تونناعا جۋىق رەلس ونىمدەرى جەتكىزىلەدى.