قازاقستاندا العاش رەت تالاپكەرلەرگە قاجەت اقپارات جينالعان ءموبيلدى قوسىمشا ىسكە قوسىلادى

وتاندىق ازىرلەمە جوعارى سىنىپ وقۋشىلارى مەن كوللەدج ستۋدەنتتەرىنە ناعىز كومەكشى بولماق.

قوسىمشا جاستارعا ەلىمىزدىڭ جوعارى وقۋ ورىندارى مەن مەملەكەتتىك جانە باسقا دا گرانتتىق باعدارلامالار تۋرالى بارلىق اقپاردى ءبىلىپ، كورىپ وتىرۋعا مۇمكىندىك بەرەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

سونداي-اق وڭىرلەردەگى بوس جۇمىس ورىندارى تۋرالى تولىق ماعلۇمات الۋعا بولادى. جوبا ۇيىمداستىرۋشىلارى ونى الداعى بىر-ەكى اي ىشىندە ىسكە قوسۋدى جوسپارلاپ وتىر.

"ءموبيلدى قوسىمشانىڭ ەڭ نەگىزگى فيشكاسى – حوللاند تەستى. بۇل تەست ادامنىڭ قانداي دا ءبىر كاسىپكە بەيىمدىلىگىن انىقتاۋعا ارنالعان. ياعني سول ارقىلى تالاپكەر وزىنە جاقىن ماماندىقتى تاڭداي الادى. تاپسىرۋ تەگىن"، - دەيدى  قازاقستان ستۋدەنتتەر اليانسى ءتوراعاسىنىڭ ءبىرىنشى ورىنباسارى امينا داريبەكوۆا. 

ايتا كەتۋ كەرەك، جوبا  اقپارات جانە قوعامدىق دامۋ مينيسترلىگىنىڭ گرانتى نەگىزىندە جۇزەگە استى.  بۇدان بولەك  53  تاقىرىپ بويىنشا مەملەكەتتىك گرانتتار ۇسىنىلدى.  ولار  ءتۇرلى الەۋمەتتىك سالالارداعى ادام قۇقىقتارىن، بالالاردى قورعاۋ، گەندەرلىك تەڭدىكتى دامىتۋ، ءبىلىم بەرۋ، دەنساۋلىق ساقتاۋ، قورشاعان ورتا، ۇلتتىق بىرلىكتى ىلگەرىلەتۋ سياقتى 15 باعىتتى قامتيدى.

"ازاماتتىق باستامالاردى قولداۋ ورتالىعى ازاماتتىق بەلسەندىلىكتى جانداندىرۋدا كوپتەگەن شارالاردى قولعا الىپ وتىر. گرانتتاردىڭ 30-ى وتباسى ساياساتىن دامىتۋعا باعىتتالعان. شامامەن 600 ملنداي تەڭگە ءبولىنىپ وتىر"، - دەيدى ازاماتتىق باستامالاردى قولداۋ ورتالىعى باسقارما ءتوراعاسىنىڭ مىندەتىن اتقارۋشى عالىم قۇرمان.