قازاقستاندا العاش رەت ءىرى قارا مال تۇقىمدارى كورمەگە شىعارىلدى

 اۋىل شارۋاشىلىعى تەحنيكاسى كورمەسى اياسىندا العاش رەت ءىرى قارا مال كوپشىلىككە ۇسىنىلدى.

«Jańa Dala/Green Day» دالا كۇنى مامانداندىرىلعان كورمەسىن ۇيىمداستىرۋشى ءادىلحان ساعىنبايەۆ كورمە جايلى ەگجەي-تەگجەيلى ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«Jańa Dala/Green Day» دالا كۇنى مامانداندىرىلعان كورمەسى ونىنشى رەت ءوتىپ وتىر. بيىلعى جاڭاشىلدىق - كورمەگە ءىرى قارا مال جانە ونىڭ ونىمدەرى شىعارىلادى. بۇعان دەيىن پاندەميا بولدى دا، ءىرى قارانى تاسىمالداۋ ءقاۋىپتى بولدى. سوڭعى ەكى جىلدا ەلىمىزدە ءسۇت جانە ءسۇت ونىمدەرى سالاسى قارقىندى دامىپ كەلەدى. ءىرى قارا مالدى كورمەگە شىعارۋ ءۇشىن شارۋالار ەلىمىزدىڭ تۇكپىر-تۇكپىرىنەن وزدەرى الىپ كەلدى»، - دەيدى ءادىلحان ساعىنبايەۆ.

ونىڭ ايتۋىنشا، حالىقارالىق كورمەگە قازاقتىڭ اقباس سيىرى، وتاندىق انگۋس، اۋليەكول تۇقىمى بويىنشا شارولە، ليمۋزين، وبراك، گەرەفورد سيىرلار دا بار.

ايتا كەتەيىك، بۇگىن-ەرتەڭ اقمولا وبلىسىندا ءداستۇرلى «Jańa Dala/Green Day» دالا كۇنى مامانداندىرىلعان كورمەسى ءوتىپ جاتىر.

بيىلعى شاراعا 19 ەلدەن 150 اگرارلىق كاسىبي كومپانيا تىركەلگەن.

اتاپ ايتقاندا، اۆستريا، بەلارۋس، گەرمانيا، يسپانيا، يتاليا، كانادا، جۇڭگو، قىرعىزستان، نيدەرلاند، پولشا، رەسەي، سەربيا، اقش، تۇركيا، فينليانديا، فرانسيا، وزبەكستان، ۋكراينا، چەحيا جانە تاعى باسقالار.

كورمە قاتىسۋشىلارى اۋىل شارۋاشىلىعى تەحنولوگيالارى، سەلەكسيالىق جەتىستىكتەر مەن مال شارۋاشىلىعى سالاسىنداعى سوڭعى ونىمدەردى ۇسىنۋدا.