كورسەتىلگەن قىزمەتتىڭ 139،3 مىڭى ەلەكتروندىق تۇردە ۇسىنىلعان.
ۇستىمىزدەگى جىلدىڭ ءبىرىنشى جارتىجىلدىعىندا «مەملەكەتتىك الەۋمەتتىك ساقتاندىرۋ قورى» الەۋمەتتىك تولەمدەردى تاعايىنداۋ بويىنشا 389،1 مىڭ قىزمەت كورسەتتى، ونىڭ 139،3 مىڭى ەلەكتروندىق تۇردە ۇسىنىلدى، دەپ حابارلايدى Almaty-akshamy.kz.
قىزمەتتەردىڭ جارتىسىنا جۋىعى (46%) 1 جاسقا دەيىنگى بالا كۇتىمىنە بايلانىستى تابىسىنان ايىرىلعان جاعدايدا تولەنەتىن الەۋمەتتىك تولەمدەردى تاعايىنداۋ بويىنشا بولدى.
سونداي-اق، رەسمي مالىمەت بويىنشا، ءبىرىنشى جارتىجىلدىقتا ەڭبەك ەتۋ قابىلەتىنەن ايىرىلۋىنا بايلانىستى الەۋمەتتىك تولەمدەر بويىنشا 14 375 قىزمەت جانە جۇمىسىنان ايىرىلۋ بويىنشا 53 936 قىزمەت كورسەتىلدى.
«بۇل رەتتە ەڭبەك ەتۋ قابىلەتىنەن ايىرىلۋ جاعدايلارىنا تولەنەتىن الەۋمەتتىك تولەمدەر بويىنشا قىزمەتتەردىڭ 42،7%-ى جانە جۇمىسىنان ايىرىلۋ بويىنشا 49%-ى كومپوزيتتىك فورماتتا كورسەتىلگەن، ياعني تولەمدەردى تاعايىنداۋعا ءوتىنىش مەديسينالىق-الەۋمەتتىك ساراپتاما بولىمدەرى جالپى ەڭبەك ەتۋ قابىلەتىنەن ايىرىلۋ دارەجەسىن بەلگىلەگەننەن كەيىن نە مىندەتتى الەۋمەتتىك ساقتاندىرۋ جۇيەسىنە قاتىسۋشى حالىقتى جۇمىسپەن قامتۋ ورتالىعىندا جۇمىسسىز رەتىندە تىركەلگەننەن كەيىن ءماسق-عا اۆتوماتتى تۇردە جىبەرىلەدى»،– دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
بۇگىنگى كۇنى سيفرلىق تەحنولوگيالاردىڭ دامۋىمەن قىزمەت الۋدىڭ نەعۇرلىم ىڭعايلى ءتاسىلى ازاماتتان ءوتىنىش تالاپ ەتىلمەيتىن پرواكتيۆتى فورماتتا الەۋمەتتىك تولەمدەردى تاعايىنداۋ بولىپ تابىلادى.
قىزمەتتى پرواكتيۆتى فورماتتا الۋ ءۇشىن الۋشى قانداي دا ءبىر قىزمەتتى رەسىمدەۋ تۋرالى كەلگەن sms-حابارلاماعا جاۋاپ بەرۋى قاجەت. اعىمداعى جىلدىڭ ءبىرىنشى جارتىجىلدىعىندا ءماسق 49،8 مىڭ پرواكتيۆتى قىزمەت كورسەتتى.
بۇدان باسقا، ەلەكتروندىق سيفرلىق قولتاڭبا بولعان كەزدە مىندەتتى الەۋمەتتىك ساقتاندىرۋ جۇيەسىنە قاتىسۋشىلار ءماسق-تان الەۋمەتتىك تولەمدى تاعايىنداۋ ءۇشىن egov.kz پورتال ارقىلى جۇگىنە الادى. 2021 جىلدىڭ ءى جارتىجىلدىعىندا ەلەكتروندىق ۇكىمەت پورتالى ارقىلى 48،3 مىڭ قىزمەت كورسەتىلدى.
سونداي-اق، 2021 جىلى ق ر ەڭبەك جانە حالىقتى الەۋمەتتىك قورعاۋ مينيسترلىگى جۇمىسسىزداردى تىركەۋ راسىمدەرىن جەڭىلدەتۋ جانە جۇمىسىنان ايىرىلۋ بويىنشا الەۋمەتتىك تولەم تاعايىنداۋ بويىنشا مەملەكەتتىك قىزمەتتەردى الۋدى جەڭىلدەتۋ ءۇشىن ەلەكتروندىق ەڭبەك بيرجاسى ارقىلى حالىقتى جۇمىسپەن قامتۋ ورتالىقتارىنا قىزمەت كورسەتۋ بويىنشا جوبانى ىسكە قوستى. Enbek.kz پورتالى ارقىلى بارلىعى 8،6 مىڭ ادامعا تولەمدەر تاعايىندالدى.
الەۋمەتتىك تاۋەكەلدەر تۋىنداعان كەزگە الەۋمەتتىك تولەمدەردىڭ مولشەرى قورعا تۇسكەن الەۋمەتتىك اۋدارىمداردىڭ سوماسىنا تىكەلەي بايلانىستى بولادى. وسىعان بايلانىستى ءماسق مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا تولەنگەن الەۋمەتتىك اۋدارىمداردى egov.kz پورتالى ارقىلى تۇراقتى نەگىزدە قاداعالاپ وتىرۋدى ۇسىنادى.