«ايبىن» اسكەر جاسىنا دەيىنگى جاستار جيىنى: قاتىسۋشىلار مەن كورەرمەندەر ءۇشىن جاڭا مۇمكىندىكتەر
ق ر قورعانىس مينيسترلىگىنىڭ دەرەگىنشە، بيىلعى شارا قازاقستان تاۋەلسىزدىگىنىڭ 30 جىلدىعىنا ارنالادى جانە 6 قازان مەن 30 قاراشا ارالىعىندا ونلاين رەجيمىندە وتەدى، دەپ حابارلايدى Almaty-akshamy.kz.
جيىندا 14 پەن 18 جاس ارالىعىنداعى جاستار اسكەري-پاتريوتتىق كلۋبتىڭ اتىنان دا، جەكە دە سايىسقا تۇسە الادى. قاتىسۋ ءۇشىن AppStore جانە Play Market قوسىمشاسىن سمارتفونعا جۇكتەۋ ارقىلى «ايبىن» ءموبيلدى قوسىمشاسىنا تىركەلۋ قاجەت.
بارلىق جارىستار مەن بايقاۋلار قاتىسۋشىلاردىڭ نورماتيۆتەر مەن تاپسىرمالاردى ورىنداۋ بارىسىنداعى ۆيدەونى ءموبيلدى قوسىمشاعا جۇكتەۋ بازاسىندا ۇيىمداستىرىلادى.
«بايقاۋلاردىڭ بارىسىن ينتەرنەت-قولدانۋشىلارى ۆەب-سايت جانە «ايبىن» ءموبيلدى قوسىمشاسى ارقىلى باقىلاي الادى. بۇل جيىندى وتكىزۋدىڭ اشىقتىعىن قامتاماسىز ەتەدى»، - دەدى باس شتاب باستىعىنىڭ ورىنباسارى – تاربيە جانە يدەولوگيالىق جۇمىستار دەپارتامەنتىنىڭ باستىعى، گەنەرال-مايور سەرىك بورامبايەۆ.
بيىل جيىن باعدارلاماسىندا جاڭا جارىس تۇرلەرى ەنگىزىلدى: «جاس سارباز – جاس ءتىلشى» اتتى جاس تىلشىلەر بايقاۋى جانە توعىزقۇمالاق ۇلتتىق ويىنىنىڭ ءونلاين-تۋرنيرى. العاش رەت تۇراقتى نەگىزدە «جاس سارباز حاب» كوۆوركينگ-ورتالىعى ىسكە قوسىلادى. بۇل رەتتە ءار سەنبى سايىن جيىن اياسىندا شەبەرلىك ساباقتارى، ترەنينگتەر، تانىمال ادامدارمەن كەزدەسۋلەر وتكىزۋ جوسپارلانۋدا.
جارىستىڭ تۇجىرىمداماسى، ەرەجەسى، رەگلامەنتى ونلاين-پلاتفورمادا ورنالاستىرىلعان.
جەڭىمپازداردى ماراپاتتاۋ مەن جيىننىڭ جابىلۋ ءراسىمى «ەگەمەن ەلدىڭ ەرتەڭى – مەن جاس سارباز» ءبىرىنشى جاس پاتريوتتار فورۋمى اياسىندا 30 قاراشادا وتەدى. وعان جۇلدەلى ورىندار يەلەنگەن كوماندالاردىڭ كاپيتاندارى قاتىسادى.
«ايبىن» جيىنىنىڭ قاتىسۋشىلارىنا ارنالعان قالعان سىيلىقتار وڭىرلەرگە جەتكىزىلەدى جانە سالتاناتتى ءراسىمنىڭ ونلاين-ترانسلياسياسى اياقتالعاننان كەيىن گارنيزون باسشىلارى جانە ارداگەرلەر تابىستايدى.
ايتا كەتەيىك، «ايبىن» اسكەري-پاتريوتتىق جيىنى 2015 جىلدان بەرى وتكىزىلىپ كەلەدى. وسى ۋاقىت ىشىندە دە ونىڭ تانىمالدىعى ارتىپ، وزىندىك داستۇرلەرى پايدا بولدى.