جاۋاپتىلىقتى قاتاڭداتۋ كوزدەلىپ وتىر.
29 جەلتوقسان كۇنى سەناتتىڭ جالپى وتىرىسىندا «ق ر قىلمىستىق جانە قىلمىستىق-پروسەستىك كودەكستەرىنە ەكولوگيالىق قۇقىق بۇزۋشىلىقتار جانە ۆانداليزم كورىنىستەرى ءۇشىن جاۋاپتىلىقتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى مەن ىلەسپە قۇجات ەكى وقىلىمدا قارالىپ، قابىلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
زاڭ جوبالارى اياسىندا ۇلتتىق پاركتەردى جانە باسقا دا تابيعي بايلىقتاردى قورعاۋ ماقساتىندا ءتيىستى وزگەرىستەر مەن تولىقتىرۋلار ەنگىزىلەدى.
سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مالىمەتىنشە، بۇل قۇجات ق ر پرەزيدەنتىنىڭ 2020 جىلعى 14 قىركۇيەكتەگى جارلىعىمەن بەكىتىلگەن قۇقىق بۇزۋشىلاردى اكىمشىلىك جانە قىلمىستىق قۋدالاۋدى كۇشەيتە وتىرىپ، قازاقستاننىڭ تابيعي بايلىعىن قورعاۋدى كوزدەيتىن قۇقىقتىق شارالاردى دايىنداۋ جونىندەگى جالپىۇلتتىق ءىس-شارالار جوسپارىن ىسكە اسىرۋ ماقساتىندا ازىرلەندى.
زاڭ اياسىندا قازاقستاننىڭ ۇلتتىق ساياباقتارىن جانە باسقا دا تابيعي بايلىعىن ەكولوگيالىق زالالداردان: جەردى بۇلدىرۋدەن، اعاشتاردى زاڭسىز كەسۋدەن، ەرەكشە قورعالاتىن تابيعي اۋماقتاردى پايدالانۋ رەجيمىن بۇزۋدان، جەر قويناۋىن ءوز بەتىنشە پايدالانۋدان جانە قورشاعان ورتاعا قوعامدىق ءقاۋىپ توندىرەتىن وزگە دە ىس-ارەكەتتەردەن قورعايتىن قۇقىقتىق نورمالار بەلگىلەنەدى.
ەكولوگيالىق زالال ءۇشىن جاۋاپتىلىقتى كۇشەيتۋ ماقساتىندا قىلمىستىق جانە قىلمىستىق-پروسەستىك كودەكستەردە اعاشتار مەن بۇتالاردى زاڭسىز كەسكەنى، جويعانى نەمەسە زاقىمداعانى، جەر قويناۋىن ءوز بەتىنشە پايدالانعانى ءارى باسقا دا قۇقىققا قارسى ارەكەتتەر ءۇشىن جاۋاپتىلىق دەڭگەيى ارتتى. سونداي-اق ۆانداليزم كورىنىستەرى، قوعامدىق جانە جەكە مۇلىكتى بۇلدىرگەنى ءۇشىن جاۋاپتىلىقتى قاتاڭداتۋ كوزدەلگەن.