100 شاقتى بالا مەرەكەلىك سىيلىقتارعا يە بولدى.
پرەزيدەنتتىڭ تاپسىرماسىنا سايكەس بالالاردى جاڭا جىلمەن قۇتتىقتاۋعا ەرەكشە كوڭىل ءبولىندى. بيىل الماتىدا ءداستۇرلى تۇردە مەكتەپتەردە، الەۋمەتتىك ورتالىقتاردا، بالالارعا بەيىمدەۋ جانە كومەك كورسەتۋ ورتالىقتارىندا بالالارعا ارنالعان شىرشالار، سونداي-اق ءحاوت ساناتىنداعى بالالار مەن مۇمكىندىگى شەكتەۋلى بالالارعا ارنالعان شىرشالار وتكىزىلدى، - دەپ حابارلايدى Almaty-akshamy.kz
الماتىنىڭ تۇركسىب اۋدانىندا 29 جەلتوقسان كۇنى كوپبالالى جانە از قامتىلعان وتباسىلاردىڭ بالالارىنا جاڭاجىلدىق سىيلىقتار تاراتىلدى، جاڭا جىلدىق شارا تۇركسىب اۋدانىنىڭ «باقىتتى وتباسى» الەۋمەتتىك ورتالىعىندا ءوتتى. جاعدايى تومەن وتباسىلار مەن كوپبالالى وتباسىنان شىققان بالالار جانە مۇگەدەكتىگى بار 100 شاقتى بالا مەرەكەلىك سىيلىقتارعا يە بولدى. سىيلىقتاردى الماتى قالاسى ءماسليحاتىنىڭ دەپۋتاتى شۋحراد شاردينوۆ تاپسىردى.
دەپۋتاتتىڭ ايتۋىنشا، تۇركسىب اۋدانىندا الەۋمەتتىك قولداۋدى قاجەت ەتەتىن بەس مىڭنان استام وتباسى تىركەلگەن. ءماسليحات دەپۋتاتتارى «باقىتتى وتباسى» ورتالىقتارىمەن تۇراقتى تۇردە ىنتىماقتاستىققا جۇمىس ىستەپ، ءاردايىم قولداۋ ءبىلدىرىپ وتىرادى. جاڭا جىل قارساڭىندا حالىقتىڭ الەۋمەتتىك وسال توپتارىنان شىققان بالالارعا جاڭا جىلدىق سىيلىقتار ۇلەستىرۋ ءداستۇرى بەس جىلدان بەرى جالعاسىپ كەلەدى. مۇنداي يگى ءداستۇر بالالارعا جاڭا جىلدىق كوڭىل كۇي سىيلايدى.