اەس-كە قاتىستى ماسەلەلەر حالىقارالىق ساراپشىلارمەن تالقىلانباق
بۇل تۋرالى ەنەرگەتيكا ءبىرىنشى ۆيسە-مينيسترى مۇرات جۇرەبەكوۆ ايتىپ بەردى، دەپ حابارلايدى اlmaty-akshamy.kz قازاقپارات سايتىنا سىلتەمە جاساپ.
«مەملەكەت باسشىسى ءوز جولداۋىندا وسى ماسەلەنى ءبىر جىلدا پىسىقتاۋدى تاپسىردى. ءقازىر ءبىز بۇل جونىندە بەلسەندى جۇمىس ىستەپ جاتىرمىز. ياعني، ءبىزدىڭ جۇمىسىمىز – وسىنداي جوبالاردى ىسكە اسىرۋ ءۇشىن قاجەتتى كريتەرييلەردى ەسكەرە وتىرىپ، ەل اۋماعىندا اەس سالاتىن ورىندى انىقتاۋ. ءبىز سونداي-اق حالىقارالىق ساراپشىلارمەن، سونىڭ ىشىندە تەحنولوگيا، قۋات بويىنشا كونسۋلتاسيالار جۇرگىزۋدەمىز. بىزدە تاپشىلىق بولا ما، ەگەر بولسا، قاي جىلى جانە قانداي كولەمدە بولاتىنىن انىقتاۋ ءۇشىن ەلەكتر تۇتىنۋ مەن ەلەكتر ءوندىرىسىنىڭ تەڭگەرىمىنە قارايمىز. بۇل جۇمىستاردىڭ بارلىعى ءقازىر كەشەندى تۇردە جۇرگىزىلۋدە»، - دەدى مۇرات جۇرەبەكوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
سونىمەن بىرگە، سپيكەر اەس-كە قاتىستى ماسەلەلەر حالىقارالىق ساراپشىلارمەن بىرگە تالقىلاناتىنىن اتاپ ءوتتى. ونىڭ ايتۋىنشا، ءبىر جىل ىشىندە ۆەدومستۆو ماسەلەنى ودان ءارى ىسكە اسىرۋ بويىنشا ءوز پايىمىن ۇسىنادى.
پرەزيدەنت قاسىم-جومارت توقايەۆ بيىلعى جولداۋىندا 2030 جىلعا قاراي ەلەكتر ەنەرگياسىنىڭ تاپشىلىعى سەزىلەتىنىن، الەمدىك تاجىريبە ەڭ وڭتايلى جول – بەيبىت اتومدى ۇسىنىپ وتىرعانىن ايتتى.