Satbayev Universityء-دىڭ قاۋىمداستىرىلعان پروفەسسورى ينەش كەنجينا اتوم ەنەرگەتيكاسىنىڭ بۇگىندە دامىعان ەلدەردىڭ ەنەرگەتيكالىق قۇرىلىمىنىڭ ماڭىزدى بولىگى ەكەنىن ايتادى.
الەمنىڭ 12 ەلىندە اەس-تەردەن وندىرىلەتىن ەلەكتر ەنەرگياسىنىڭ ۇلەسى 30%-دان اسسا، فرانسيادا بۇل كورسەتكىش 72%-دى قۇرايدى. قازىرگى زاماناۋي اەس-تەر ەل ەكونوميكاسىنىڭ يندۋستريالدىق دامۋى ءۇشىن بازالىق قۋاتتىڭ سەنىمدى كوزى بولىپ تابىلادى.
– قازاقستاندا اتوم ەلەكتر ستانسياسىن سالۋ – ەلدىڭ ەنەرگەتيكا سالاسىن ءارتاراپتاندىرۋدىڭ پەرسپەكتيۆتى باعىتى. بۇل ەنەرگيا گەنەراسيالاۋ كوزدەرىنىڭ قۇرىلىمىن تۇراقتىراق ەتەدى جانە ەلىمىزدىڭ ەنەرگيا رەسۋرستارىن ۇتىمدى پايدالانۋعا مۇمكىندىك بەرەدى، – دەپ اتاپ ءوتتى ينەش كەنجينا.
اەس تابيعي رەسۋرستاردى ءتيىمدى پايدالانۋعا مۇمكىندىك بەرەدى
قازاقستان ۋران قورى بويىنشا الەمدەگى ەڭ باي ەلدەردىڭ ءبىرى بولىپ تابىلادى، ال «قازاتومونەركاسىپ» ۇاك اق تابيعي ۋراننىڭ الەمدەگى ەڭ ءىرى ءوندىرۋشىسى جانە كوپتەگەن مەملەكەتتەرگە ۋران جەتكىزىپ، الەمدىك اتوم ەنەرگەتيكاسىنىڭ 40%-دان استام قاجەتتىلىگىن قامتاماسىز ەتەدى. وسىعان بايلانىستى Satbayev University قاۋىمداستىرىلعان پروفەسسورى ينەش كەنجينا ەلىمىزدە اتوم ەنەرگەتيكاسىن دامىتۋ قاجەتتىلىگىن اتاپ ءوتتى.
– بۇل ەلەكتر ەنەرگياسىن ءوندىرۋ ءۇشىن ءوزىمىزدىڭ تابيعي رەسۋرستاردى ءتيىمدى پايدالانۋعا، كومىرسۋتەكتەر مەن باسقا دا ەنەرگيا رەسۋرستارىنىڭ يمپورتىنا تاۋەلدىلىكتى ازايتۋعا مۇمكىندىك بەرەدى، بۇل ەلدىڭ ەنەرگەتيكالىق قاۋىپسىزدىگىنىڭ ماڭىزدى ەلەمەنتى بولىپ تابىلادى. سونىمەن قاتار، قازاقستان ءوز ايماقتىق ەنەرگەتيكالىق قاۋىپسىزدىگىن نىعايتىپ، كورشىلەس ەلدەرگە ەلەكتر ەنەرگياسىن ەكسپورتتاۋ الەۋەتىن ارتتىرا الادى. اەس مۇناي مەن گازبەن شەكتەلمەي، ەنەرگيا رەسۋرستارىنىڭ ەكسپورتىن ءارتاراپتاندىرۋدىڭ ماڭىزدى ەلەمەنتى بولا الادى، – دەپ اتاپ ءوتتى ساراپشى.