وسى ماسەلەمەن شۇعىلداناتىن مامانداردىڭ وتىرىسى ءوتتى.
قازاقستان ۇكىمەتىنىڭ مۇشەلەرى ادام ساۋداسىنا قارسى كۇرەس جۇمىستارى قالاي جۇرگىزىلىپ جاتقانىن باياندادى. وسى ماقساتتا بەينەكونفەرەنسيا رەجيمىندە ادامداردى زاڭسىز اكەتۋگە، اكەلۋگە جانە ساتۋعا قارسى كۇرەس ماسەلەلەرى جونىندەگى ۆەدومستۆوارالىق كوميسسيانىڭ 41 وتىرىسى ءوتتى، دەپ حابارلايدى Almaty-akshamy.kz.
«كەڭەسكە جوعارعى سوت، باس پروكۋراتۋرا، ۇلتتىق قاۋىپسىزدىك كوميتەتى، ق ر قارجى مونيتورينگى اگەنتتىگى، 8 مينيسترلىك، ق ر پرەزيدەنتى جانىنداعى ادام قۇقىقتارى جونىندەگى كوميسسيا، ادام قۇقىقتارى جونىندەگى ۇلتتىق ورتالىق، جەرگىلىكتى اتقارۋشى ورگاندار مەن ۇەۇ وكىلدەرى قاتىستى»، – دەلىنگەن ەڭبەكمين باسپا ءسوز قىزمەتىنىڭ حابارلاماسىندا.
قازاقستان ۇكىمەتىنىڭ ادام ساۋداسىنا بايلانىستى قىلمىستاردىڭ الدىن الۋ، بولدىرماۋ جانە ولارعا قارسى كۇرەس جونىندەگى 2021 – 2023 جىلدارعا ارنالعان ءىس-شارالار جوسپارىنىڭ ورىندالۋ بارىسى تۋرالى وتىرىسقا قاتىسۋشىلاردى ەڭبەكمينى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى البينا بورانباي قىزى حاباردار ەتكەن.
«اعىمداعى جىلعى 26 مامىردا وتكەن ۆاك-تىڭ 40-وتىرىسىنىڭ قورىتىندىسى بويىنشا ادام ساۋداسىنا قارسى ءىس-قيمىل سالاسىنداعى نورماتيۆتىك قۇقىقتىق اكتىلەردى جەتىلدىرۋ شەڭبەرىندە ق ر الەۋمەتتىك كودەكسىنىڭ تۇجىرىمداماسىنا قازاقستان اۋماعىندا ۋاقىتشا بولاتىن شەتەلدىك ادام ساۋداسىنىڭ قۇرباندارىنا ارناۋلى الەۋمەتتىك قىزمەتتەر كورسەتۋدى قاراستىراتىن نورما ەنگىزىلدى. قازىرگى ۋاقىتتا بۇل نورما مەملەكەتتىك ورگاندارمەن كەلىسۋدەن وتۋدە»، – دەدى البينا بورانباي قىزى.
مامانداردىڭ ايتۋىنشا، ناۋرىز جانە ماۋسىم ايلارىندا ىشكى ىستەر ورگاندارى رەسپۋبليكا اۋماعىندا «STOP ترافيك» جەدەل-الدىن الۋ ءىس-شارالارىن جۇرگىزدى. ولاردىڭ قورىتىندىسى بويىنشا ءىىم اۋماقتىق بولىمشەلەرى قىلمىستىق كودەكستىڭ ءتۇرلى باپتارى بويىنشا 87 سوتقا دەيىنگى تەرگەۋدى باستادى (قاناۋ ماقساتىندا ادام ۇرلاۋ، قاناۋ ماقساتىندا باس بوستاندىعىنان زاڭسىز ايىرۋ، كامەلەتكە تولماعاندى جەزوكشەلىكپەن اينالىسۋعا تارتۋ، كامەلەتكە تولماعانداردى ساۋداعا سالۋ، جەزوكشەلىكپەن اينالىسۋعا تارتۋ، جەزوكشەلىكپەن اينالىسۋعا ارنالعان پريتوندار ۇيىمداستىرۋ نەمەسە ۇستاۋ جانە جەڭگەتايلىق).
سونىمەن قاتار ماماندار، قازاقستان اۋماعىندا ۋاقىتشا تۇراتىن شەتەلدىكتەرگە جانە ادام ساۋداسىنىڭ قۇربانى بولعان ازاماتتىعى جوق ادامدارعا ارناۋلى الەۋمەتتىك قىزمەتتەر (بۇدان ءارى – ءااق) كورسەتۋ بولىگىندە قولدانىستاعى زاڭناماعا وزگەرىستەر مەن تولىقتىرۋلار ەنگىزۋ ماسەلەلەرىن قاراعان.
بۇل تولىقتىرۋلار بويىنشا، شەتەلدىك ازاماتتارعا ق ر ازاماتتارىمەن تەڭ دارەجەدە تەگىن مەديسينالىق كومەك بەرىلەدى، ولارعا قۇقىقتىق كونسۋلتاسيا بەرىلەدى جانە دە باسقا دا كومەك بەرىلەدى.
«بۇل نورمالار شەتەلدىك ادام ساۋداسىنىڭ قۇرباندارىنا كورسەتىلەتىن كومەك كولەمىنە تەڭ دارەجەدە قول جەتكىزۋگە مۇمكىندىك بەرەدى، ولاردىڭ تەرگەۋ مەن قىلمىستىق قۋدالاۋعا تارتىلۋىنا قاراماستان، الەۋمەتتىك كومەك كورسەتۋدى قامتاماسىز ەتۋگە مۇمكىندىك بەرەدى»، – دەپ اتاپ ءوتتى ەڭبەكمينى الەۋمەتتىك قىزمەتتەر ساياساتىن دامىتۋ دەپارتامەنتىنىڭ ديرەكتورى.