بۇگىنگى تاڭدا قازاقستاندا ادام پاپيللوماسى ۆيرۋسىنا (اپۆ) قارسى ۆاكسينا 11-13 جاس ارالىعىنداعى 83،7 مىڭنان استام قىزعا ەگىلدى، دەپ حابارلايدى aqshamnews.kz.
ق ر دەنساۋلىق ساقتاۋ مينيسترلىگىنىڭ مالىامەتىنشە، ينفەكسيالىق جانە ونكولوگيالىق اۋرۋلار پروفيلاكتيكاسىنىڭ ۇلتتىق باعدارلاماسىنىڭ شەڭبەرىندە قازان ايىندا قىزداردى ادام پاپيللوماسى ۆيرۋسىنا (اپۆ) قارسى ۆاكسيناسيالاۋ بويىنشا اۋقىمدى ناۋقان باستالدى. اپۆ - بۇل جاتىر موينى وبىرىن قوسا العاندا، ءبىر قاتار ونكولوگيالىق اۋرۋلاردىڭ دامۋىمەن بايلانىستى ەڭ كوپ تارالعان ۆيرۋستاردىڭ ءبىرى.
قازاقستاندا جاتىر موينى وبىرى (جمو) بارلىق جاستاعى ايەلدەردىڭ اراسىندا ءسۇت بەزى وبىرىنان كەيىنگى ەكىنشى جانە فەرتيلدىك جاستاعى (25-44 جاس) ايەلدەر ءولىمىنىڭ ەكىنشى سەبەبى بولىپ تابىلادى.
ۇلتتىق كانسەر-تىركەلىمنىڭ دەرەكتەرى بويىنشا قازاقستاندا جىل سايىن جاتىر موينى وبىرىنىڭ 2000-عا جۋىق جاعدايى انىقتالادى، 600-دەن استام ايەلدىڭ ءومىرىن ساقتاپ قالۋ مۇمكىن ەمەس. قازورعزي زەرتتەۋىنىڭ ناتيجەلەرى بويىنشا جاتىر موينى وبىرىنىڭ 74،2% جاعدايىندا بيوپسيالىق ماتەريالدا ادام پاپيللوماسى ۆيرۋسىنىڭ (اپۆ) 16 جانە 18 ونكوگەندىك تۇرلەرى انىقتالدى.
قازاقستاندا ەكپەلەر مەكتەپتەردىڭ مەديسينالىق كابينەتتەرىندە اتا-انالارىنىڭ نەمەسە زاڭدى وكىلدەرىنىڭ اقپاراتتاندىرىلعان كەلىسىمىن العاننان كەيىن جۇرگىزىلەدى. اتا-انالاردىڭ ءوتىنىشى بويىنشا ۆاكسيناسيالاۋ تىركەلگەن جەرى بويىنشا ەمحانالاردا دا جۇرگىزىلۋى مۇمكىن.
ۆاكسيناسيالانعانداردىڭ اراسىندا يممۋنداۋدان كەيىن قولايسىز كورىنىستەر تىركەلگەن جوق.
جاتىر موينىنىڭ وبىرالدى زاقىمدانۋىن تومەندەتۋدە ۆاكسيناسيانىڭ جوعارى تيىمدىلىگى اقش، اۋستراليا، كانادا، دانيا، يرلانديا، شۆەسيا، فينليانديا، جاڭا زەلانديا، شوتلانديا جانە ت. ب. سياقتى ەلدەردە كورسەتىلدى.
سەنىمدى اقپارات الۋ ءۇشىن رەسمي دەرەككوزدەردى پايدالانۋدى ۇسىنامىز: egu.kz سايتى جانە ق ر دەنساۋلىق ساقتاۋ مينيسترلىگى سانەپيدباقىلاۋ كوميتەتىنىڭ، ۇلتتىق قوعامدىق دەنساۋلىق ساقتاۋ ورتالىعىنىڭ، كسەك اۋماقتىق بولىمشەلەرىنىڭ جانە دەنساۋلىق ساقتاۋ باسقارمالارىنىڭ رەسمي پاراقتارى.\
سونداي-اق، حالىقتى يممۋنداۋ ماسەلەلەرى بويىنشا 7701 كولل-ورتالىعى جۇمىس ىستەيدى، وندا اپۆ-عا قارسى ۆاكسيناسيالاۋدى قوسا العاندا، قازاقستاندا جۇزەگە اسىرىلاتىن جوسپارلى ەگۋلەر بويىنشا سۇراقتارعا جاۋاپ الۋعا بولادى. اپۆ-عا قارسى ۆاكسيناسيالاۋ - بۇل تەك جەكە قورعانىس ەمەس، سونىمەن قاتار بۇكىل قوعامنىڭ دەنساۋلىعىنا قوسقان ۇلەس بولىپ تابىلادى. بارىنشا كوپ ادام ەگىلسە، سوعۇرلىم بۇل ۆيرۋستىڭ اينالىمىن شەكتەۋ ءتيىمدى بولادى.