كەيىنگى جىلدارى ەلىمىزدە ۇلتتىق سپورت تۇرلەرى قارقىندى دامىپ كەلەدى. ستاتيستيكالىق مالىمەتتەرگە سايكەس، 2023 جىلى ۇلتتىق سپورت تۇرلەرىمەن تۇراقتى تۇردە شۇعىلدانۋشىلار سانى 619،2 مىڭ ادامدى قۇراسا، 2024 جىلى بۇل كورسەتكىش 666،1 مىڭ ادامعا جەتكەن، دەپ حابارلايدى aqshamnews.kz
دەنە شىنىقتىرۋ جانە سپورتپەن اينالىساتىنداردىڭ جالپى سانىنىڭ 9،6%-ى ۇلتتىق سپورت تۇرلەرىمەن شۇعىلدانادى. بۇگىندە رەسپۋبليكا بويىنشا ۇلتتىق سپورت تۇرلەرىنەن 16 555 ۇيىرمە جۇمىس ىستەيدى. سونىمەن قاتار كادر دايارلاۋ سالاسىندا 15 بالالار مەن جاسوسپىرىمدەر سپورت مەكتەپتەرى جانە 17 سپورت كلۋبى بار.
ۇلتتىق قۇراما كوماندالاردى دايارلاۋدى ۇيلەستىرۋدى قازاقستان رەسپۋبليكاسى تۋريزم جانە سپورت مينيسترلىگىنە قاراستى ۇلتتىق جانە ات سپورتى تۇرلەرى ورتالىعى جۇزەگە اسىرادى. سونىمەن قاتار ءداستۇرلى سپورت تۇرلەرىن ناسيحاتتاۋدا ۇلتتىق سپورت قاۋىمداستىعى ماڭىزدى ءرولدى اتقارادى. اتالعان ۇيىمنىڭ قۇرامىندا 10 فەدەراسيا جۇمىس ىستەيدى.
اتاپ ايتقاندا، كوكپار، جامبى اتۋ، اۋدارىسپاق، تەڭگە ءىلۋ، بايگە، ساداق اتۋ، قۇسبەگىلىك، توعىزقۇمالاق، اسىق اتۋ، JORYQ ات سپورتى. ودان بولەك جاپپاي كوكپار، قازاق كۇرەسى جانە جەكپە-جەك فەدەراسيالارى بار. ۇلتتىق سپورت تۇرلەرى ەل تۇرعىندارى اراسىندا تانىمال بولىپ قالا بەرەدى. ولاردىڭ ىشىندە ستراتەگيالىق ويلاۋ قابىلەتىن دامىتاتىن توعىزقۇمالاق، 159 مىڭنان استام ادام جاتتىعاتىن قازاق كۇرەسى جانە 78 مىڭنان استام قاتىسۋشىسى بار كوكپار سپورتى ەرەكشە مانگە يە.
بىلتىر ەلوردادا كوشپەندىلەردىڭ وليمپياداسىنا بالانعان 5ء-شى دۇنيەجۇزىلىك كوشپەندىلەر ويىندارى ءوتتى. ۇلى دالانى دۇبىرگە بولەگەن جارىسقا الەمنىڭ 90-عا جۋىق مەملەكەتتەن 2500-دەن استام سپورتشى قاتىسىپ، 21 سپورت تۇرىنەن 97 مەدال جيىنتىعىن ساراپقا سالدى. بۇل ماڭىزدى وقيعا ەتنومادەني قوزعالىسقا، ۇلتتىق سپورت تۇرلەرىن دامىتۋعا دا تىڭ سەرپىن بەردى. سونداي-اق ەلدە جىل سايىن حالىقارالىق تۋرنيرلەردەن باستاپ اۋىل چەمپيوناتتارىنا دەيىنگى 1000-نان استام جارىس وتكىزىلەدى.
سونداي-اق ءار ءتورت جىل سايىن ۇلتتىق سپورت تۇرلەرىنىڭ فەستيۆالى مەن «اقبيداي» رەسپۋبليكالىق اۋىل ويىندارى سياقتى ءىرى سپورتتىق ءىس-شارالار ۇيىمداستىرىلادى. بۇل جارىستار ۇلتتىق سپورت تۇرلەرىنە دەگەن قىزىعۋشىلىقتى ارتتىرىپ، ءارى قاراي دامۋىنا دا ىقپال ەتەدى.