گەندەرلىك تەڭدىكتى قالىپتاستىرۋدا ەلەۋلى تابىستارعا قول جەتكىزدىك - ءاليحان سمايىلوۆ.
ءاليحان سمايىلوۆ نازىك جاندىلاردى حالىقارالىق ايەلدەر كۇنىمەن قۇتتىقتادى، دەپ حابارلايدى اlmaty-akshamy.kz. ۇكىمەت باسشىسى ءوزىنىڭ Facebook پاراقشاسىندا قۇتتىقتاۋ ءماتىنىن جاريالادى.
اياۋلى انالار!
قىمباتتى ارۋلار!
بارشاڭىزدى 8 ناۋرىز – حالىقارالىق ايەلدەر كۇنىمەن شىن جۇرەكتەن قۇتتىقتايمىن!
قازىرگى كەزەڭدە ايەلدەر قاۋىمى قوعامدىق ءومىردىڭ ەڭ بەلسەندى بولىگىنە اينالىپ وتىر.
قازاقستاندا 4،3 ملن ايەل جۇمىسپەن قامتىلعان. بۇل – ەڭبەك مايدانىندا جۇرگەن جالپى حالىقتىڭ 48%-ى. مەملەكەت سۋبسيديالايتىن جۇمىس ورىندارىنا تۇرۋعا بويجەتكەن قىزدارىمىز بەلسەندىلىك تانىتادى. وتكەن جىلى 30 مىڭعا جۋىق جاس بويجەتكەن جۇمىسقا ورنالاسىپ، العاشقى ەڭبەك جولىن باستادى.
مەملەكەت بيزنەسپەن اينالىسۋعا نيەتتى ايەلدەردى بۇتىندەي قولداپ كەلەدى. ولاردى وقىتىپ، ءارى قاراي جۇمىسقا تۇرۋىنا نەمەسە بيزنەس الەمىندەگى باعىن سىناۋىنا مۇمكىندىك بەرەدى. گرانتتار مەن جەڭىلدىكتى قارىز ءبولىپ، سۋبسيديالانعان جانە كەپىلدەندىرىلگەن نەسيە ۇسىنادى.
ەىدۇ دەرەكتەرىنە ساي، قازاقستاندا كاسىپكەر ايەلدەردىڭ ۇلەسى 45%-دى قۇراپ وتىر. بۇل – اقش جانە تۇركيا ەلدەرىمەن سالىستىرعاندا جوعارى كورسەتكىش.
ايەلدەردىڭ دەنساۋلىعىنا دا زور كوڭىل ءبولىنىپ كەلەدى. تەك 2022 جىلدىڭ وزىندە عانا انا ءولىم-جىتىمىنىڭ 2،6 ەسەگە ازايعانى – وسىناۋ دايەكتى جۇمىستاردىڭ ناتيجەسى.
ءبىزدىڭ ەلىمىزدە ايەلدەر ەر-ازاماتتارمەن قاتار يىق تىرەستىرە ءجۇرىپ، مەملەكەتتىك باسقارۋ ىسىنە بەلسەندى قاتىسىپ وتىر. ەگەر 2010 جىلى مەملەكەتتىك قىزمەتتەگى ايەلدەردىڭ ۇلەسى 52،7% بولسا، وتكەن جىلى 55،4%-عا جەتتى.
ۇكىمەت، سونداي-اق، مەنشىگىندە مەملەكەتتىڭ قاتىسۋ ۇلەسى بار كومپانيالار باسشىلىعىندا ايەلدەردىڭ ۇلەسىن 30%-عا دەيىن كەزەڭ-كەزەڭمەن ارتتىرۋ شارالارىن قابىلداۋدا.
ايەلدەردى الەۋمەتتىك قولداۋ ماسەلەسى دە نازاردان تىس قالمايدى. انا مەن بالانى قورعاۋ، كوپ بالالى انالارعا، بالا اسىراپ الىنعان وتباسىلارعا كومەك كورسەتۋ، جۇمىسقا ورنالاسۋعا جاردەمدەسۋ، ۇلكەندەرگە قامقورلىق جاساۋ مەملەكەتتىك ساياساتتىڭ ماڭىزدى باعىتتارى بولىپ قالا بەرمەك.
قازاقستان گەندەرلىك تەڭدىك ورناعان قوعام قالىپتاستىرۋدا ايتارلىقتاي جەتىستىكتەرگە جەتتى. 2022 جىلى قازاقستان وسى سالاداعى تابىستى رەفورمالاردىڭ ارقاسىندا «گەندەرلىك الشاقتىق يندەكسى» (Global Gender Gap Index) رەيتينگى بويىنشا 15 پوزيسياعا جوعارىلاپ، 146 ەلدىڭ اراسىندا 65ء-شى ورىندى يەلەندى.
مەملەكەت الداعى ۋاقىتتا دا قازاقستاندىق ايەلدەردىڭ ءال-اۋقاتىن جاقسارتۋ ءۇشىن بار كۇشىن سالادى.
كورىكتى كوكتەمنىڭ وسىناۋ شۋاقتى كۇنىندە ەكونوميكانىڭ سان ءتۇرلى سالاسىندا ەڭبەك ەتىپ، ەلدىگىمىزدى نىعايتۋعا، كەمەل ۇرپاق تاربيەلەپ، وتباسىلىق قۇندىلىقتارىمىزدى باياندى ەتۋگە ولشەۋسىز ۇلەس قوسىپ كەلە جاتقان سىزدەرگە شىنايى قۇرمەتىمدى بىلدىرۋگە رۇقسات ەتىڭىزدەر. بارشاڭىزعا زور دەنساۋلىق، شاڭىراقتارىڭىزعا شاتتىق تىلەيمىن. مەرەكەلەرىڭىز قۇتتى بولسىن!