ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ينۆەستيسيالىق احۋالدى جاقسارتۋ جونىندەگى كەڭەستىڭ كەزەكتى وتىرىسىندا قازاقستاننىڭ دەنساۋلىق ساقتاۋ سالاسىن ودان ءارى دامىتۋ ماسەلەلەرى تالقىلاندى، دەپ حابارلايدى almaty-akshamy.kz
ءىس-شاراعا ۇلىبريتانيانىڭ قازاقستان رەسپۋبليكاسىنداعى ەلشىسى كەتي ليچ، كانادا ەلشىسى الان حەمسون، اقش ەلشىسى دەنيەل روزەنبليۋم، دۇنيەجۇزىلىك بانك پەن سيتيبانكتىڭ قازاقستان بويىنشا وكىلدەرى، Ernst & Young، AstraZeneca، Janssen جانە Pfizer كومپانيالارىنىڭ وكىلدەرى، سونداي-اق قازاقستان رەسپۋبليكاسىنىڭ ورتالىق مەملەكەتتىك ورگاندارىنىڭ باسشىلارى قاتىستى.
جيىنعا قاتىسۋشىلار زاماناۋي مەديسينالىق تەحنولوگيالاردى ەنگىزۋ، دەنساۋلىق ساقتاۋ ينفراقۇرىلىمىن جاڭعىرتۋ، بىلىكتى ماماندار دايارلاۋ، فارماسيەۆتيكا سالاسىن دامىتۋ، حالىقتىڭ يننوۆاسيالىق دارى-دارمەكتەرگە قولجەتىمدىلىگىن ارتتىرۋ، شالعايداعى ەلدى مەكەندەردىڭ تۇرعىندارىنا مەديسينالىق قىزمەت كورسەتۋ جانە باسقا دا ءبىرقاتار ماسەلەنى جان-جاقتى تالقىلادى.
پرەمەر-مينيستر سوڭعى جىلدارى قازاقستاندا دەنساۋلىق ساقتاۋ سالاسىندا اۋقىمدى رەفورما جۇرگىزىلىپ جاتقانىن اتاپ ءوتتى. اتاپ ايتقاندا، ءبىرىڭعاي ۇلتتىق دەنساۋلىق ساقتاۋ جۇيەسى قۇرىلدى، مىندەتتى مەديسينالىق ساقتاندىرۋ ەنگىزىلدى، تەلەمەديسينا دامىپ كەلەدى، قۇرال-جابدىقتار مەن دارى-دارمەكتەر ساتىپ الۋ پروسەسى جاقساردى، دارىگەرلەردىڭ جالاقىسى ەداۋىر ارتتى.
«جالپى، ۇكىمەت 2027 جىلعا قاراي مەديسينا سالاسىن قارجىلاندىرۋ دەڭگەيىن ءجىو-نىڭ 5%-نا دەيىن جەتكىزە وتىرىپ، اتالعان سالانى دامىتۋدىڭ تۇراقتى مودەلىن قۇرۋ بويىنشا جۇمىس جۇرگىزىپ جاتىر. وسىعان وراي ءبىز ينۆەستيسيالار مەن وزىق تەحنولوگيالار تارتۋعا مۇددەلىمىز»، — دەدى ءاليحان سمايىلوۆ.
ول ۇكىمەت قابىلداپ جاتقان شارالار سالانىڭ ينۆەستيسيالىق تارتىمدىلىعىنا وڭ اسەرىن تيگىزەتىنىن ايتتى. ماسەلەن، وتكەن جىلدىڭ قورىتىندىسىنا سايكەس دەنساۋلىق ساقتاۋ سالاسىنداعى نەگىزگى كاپيتالعا سالىنعان ينۆەستيسيا كولەمى شامامەن $540 ملن-دى قۇراپ، 30%-عا ءوستى. سونىمەن قاتار سوڭعى 7 جىلدا فارماسيەۆتيكا نارىعىنىڭ كولەمى 2،9 ەسەگە ارتتى.
ونىڭ ايتۋىنشا، مەديسينا ينفراقۇرىلىمىن جاقسارتۋ بويىنشا كەشەندى شارالار قابىلدانىپ كەلەدى. ماسەلەن، ق ر پرەزيدەنتىنىڭ تاپسىرماسى بويىنشا جەكە ينۆەستيسيالار تارتۋ ارقىلى 20 زاماناۋي كوپبەيىندى اۋرۋحانا سالۋ جوسپارلانىپ وتىر. سونداي-اق «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 655 العاشقى مەديسينالىق-سانيتاريالىق كومەك كورسەتۋ نىسانى پايدالانۋعا بەرىلىپ، 32 كوپبەيىندى اۋداندىق اۋرۋحانا جاڭعىرتىلادى.
پرەمەر-مينيستر ۇكىمەت مەملەكەتتىك قولداۋ شارالارىنىڭ پاكەتتەرىن ۇسىنا وتىرىپ، فارماسيەۆتيكالىق يندۋستريانىڭ الەمدىك ءىرى وكىلدەرىمەن دە بەلسەندى ىسكەرلىك بايلانىستاردى ارتتىراتىنىن اتاپ ءوتتى. وسىلايشا، Pfizer كومپانياسىمەن دارى-دارمەك ءوندىرىسىن لوكاليزاسيالاۋ بويىنشا ينۆەستيسيالىق كەلىسىم جاساۋ جوسپارلانىپ وتىر. AstraZeneca كومپانياسىمەن ينۆەستيسيا كولەمى $32 ملن بولاتىن بىرەگەي دارىلىك زاتتاردىڭ كەلىسىمشارتتىق ءوندىرىسىن قۇرۋ تۋرالى ۋاعدالاستىققا قول جەتكىزىلدى.
سونىمەن بىرگە ق ر پرەزيدەنتىنىڭ اقش-قا ساپارى بارىسىندا GE Healthcare كومپانياسىمەن قۇنى $60 ملن بولاتىن مەديسينالىق تەحنيكا ءوندىرىسىن لوكاليزاسيالاۋ جونىندەگى نەگىزدەمەلىك كەلىسىمگە قول قويىلدى. سونداي-اق Roche كومپانياسىمەن $2،5 ملن سوماعا ءبىرقاتار جوبا پىسىقتالىپ جاتىر. وڭتۇستىك كورەيا، تۇركيا، ەگيپەت جانە يزرايل ينۆەستورلارىمەن كەلىسىم-شارتتىق ءوندىرىس جوبالارى جۇزەگە اسىرىلۋدا.
«دارىلىك زاتتارعا سۇرانىستىڭ ارتۋى اياسىندا دەنساۋلىق ساقتاۋ سالاسىنىڭ، ونىڭ ىشىندە فارماسيەۆتيكا ونەركاسىبىنىڭ دامۋ الەۋەتى وتە زور»، — دەپ اتاپ ءوتتى ءاليحان سمايىلوۆ.
جيىندى قورىتىندىلاي كەلە پرەمەر-مينيستر ۋاكىلەتتى مەملەكەتتىك ورگاندارعا كەڭەس بارىسىندا ايتىلعان ۇسىنىستار مەن ۇسىنىمدار بويىنشا جۇمىستى پىسىقتاۋدى تاپسىردى.